کوردستان فاوندەیشن قوتابخانە وێرانبووەکانی چەمچەماڵ نۆژەن دەکاتەوە

ئاڤا نیوز

 

لەسەر ڕاسپاردەی ئارین مەسرور بارزانی، دامەزراوەی کوردستان فاوندەیشن بڕیاری دا قوتابخانەی تەکیەی بنەڕەتی و ئەو قوتابخانانەی لە چەمچەماڵ زیانیان بەرکەوتووە نۆژەن بکرێنەوە.

 

وێنەگەورەکە: ئەم هەفتەیە شەپۆلێکی باران و بەفر هەرێمی کوردستانی گرتەوە، لە چەند شار و شارۆچکەیەک لافاو دروست بوو زیانی گیانی و ماددەی لێ کەوتەوە. یەکێک لەو ناوچانەی کە زیانی زۆریان بەرکەوت سنووری چەمچەماڵ بوو، لەناویاندا ژمارەیەک قوتابخانە.

 

لێدوانی فەرمی: ساکار عومەر، بەڕێوەبەری پەیوەندییەکانی کوردستان فاوندەیشن بە ئاڤای گوت، لە چوارچێوەی هەڵمەتی هاوکارییەکانی کوردستان فاوندەیشن بۆ هاوکاری زیانلێکەوتووانی ڕووداوی لافاوەکەی قەزای چەمچەماڵ لەسەر ڕاسپاردەی ئارین مەسرور بارزانی، دامەزرێنەری کوردستان فاوندەیشن، بڕیار درا قوتابخانەی قەندیلی بنەڕەتی لە تەکیەی چەمچەماڵ نۆژەن بکرێتەوە.

 

-بۆ ئەو مەبەستە تیمێکی خۆبەخشی 60 کەسی لەوێن بۆ هەڵسەنگاندنی زیانەکان و دوای ئامادەکردنی ڕاپۆرتێک، دەست دەکرێت بەنۆژەنکردنەوەی قوتابخانەی قەندیلی بنەڕەتی و سەرجەم قوتابخانەکانی دیکە بەهۆی لافاو زیانییان بەرکەوتبێت.

 

بۆچی گرنگە: پێنج ڕۆژی دیکە دەست دەکرێت بە تاقیکردنەوەی کۆتایی وەرزی یەکەم، بەڵام بە بڕیارێکی وەزارەتی پەروەردە تاقیکردنەوەکانی وەرزی یەکەمی سەرجەم ناوەندەکانی خوێندنی سنووری قەزای چەمچەماڵ دواخرا بۆ مانگی یەکی ساڵی 2026. بە نۆژەنکردنەوەی قوتابخانەکانە زیان بەرکەوتووەکان قوتابییان دەتوانن لەکاتی دیاریکراودا دەست بە پڕۆسەی خوێندن و تاقیکردنەوەکان بکەنەوە.