لە دوو ڕۆژی داهاتوودا دادگای فیدراڵی ئەنجامی کۆتایی هەڵبژاردنەکان پەسەند دەکات

ئاڤا نیوز

 

چاوەڕوان دەکرێت لە دوو ڕۆژی داهاتوودا، دادگای باڵای فیدراڵیی عێراق ئەنجامی کۆتایی هەڵبژاردنەکان پەسەند بکات، فشارە دەرەکییەکانیش بەتایبەت لەلایەن ئەمریکاوە بۆ یەکلاکردنەوەی پۆستە باڵاکان بە ڕوونی دەردەکەون.

 

بۆچی گرنگە: بە پەسەندکردنی ئەنجامەکان لەلایەن دادگای فیدراڵییەوە، قۆناغێکی نوێی ململانێی سیاسی دەستپێدەکات و پێکهاتە سەرەکییەکان کورد، شیعە و سونە دەکەونە بەردەم بەرپرسیارێتیی یەکلاییکردنەوەی کاندیدەکانیان بۆ پۆستە سیادییەکان سەرۆککۆمار، سەرۆکی پەرلەمان و سەرۆک وەزیران.

 

لێدوانی فەرمی: عەباس عەبود، توێژەری سیاسی  ڕایگەیاند: لەکاتێکدا کات لەبەردەم هێزە سیاسییەکان کەمە بۆ ڕێگریکردن لە دروستبوونی هەردوو بۆشایی سیاسی و دەستووری، فشارە دەرەکییەکان بەتایبەت لەلایەن ئەمریکاوە بە ڕوونی دەرکەوتوون. 

 

ئاماژەی بەوەکرد، واشنتن بە وردی چاودێریی دۆخەکە دەکات و چەندین پەیام و نێردراوی ئاراستەی عێراق کردووە، یەکێک لەوانە مارک ساڤایایە، کە بە پێچەوانەی نێردراو و باڵیۆزەکانی پێشوو، لە دامەزراوەی دیپلۆماسییەوە نەهاتووە، بەڵکو نوێنەرایەتیی دامەزراوەی بازرگانانی ئەمریکا دەکات.

 

ئەمەش بزانە: کۆمیسیۆنی باڵای سەربەخۆی هەڵبژاردنەکانی عێراق دۆسیەی 853 تانەی پەیوەست بە ئەنجامەکانی هەڵبژاردنی ئەنجومەنی نوێنەرانی یەکلاکردەوە و بۆ پەسەندکردنی ئاراستەی دادگای بالای فیدراڵی کرد.