تیمی چاودێری دارایی عێراق کارەکانیان لە کوردستان تەواو بوو و گەڕانەوە بەغدا

ئاڤا نیوز

تیمی هاوبەشی چاودێریی دارایی هەرێمی کوردستان و عێراق، دوای هەفتەیەک لە بەدواداچوون بۆ داهات و خەرجی فەرمانگەکان، کارەکانیان تەواو بوو و تیمی چاودێری دارایی عێراق گەڕانەوە بەغدا.

چیرۆکی سەرەکی: لە چەند ڕۆژی ڕابردوو تیمێکی چاودێریی دارایی عێراق، بۆ وردبینی لە خەرجی و داهاتەکانی حکومەتی هەرێمی کوردستان گەیشتنە هەولێر و بۆماوەی هەفتەیەک بە هاوبەشی تیمی چاودێری دارایی هەرێمی کوردستان بەدواداچوونیان بۆ خەرجی و داهات کرد.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای وت، "کارەکانی تیمەکە تەواو بوون و سەردانی هەموو ئەو دامەزراوانەیان کرد کە پێویست بوو، تیمەکە ڕاپۆرتی خۆیان نووسیوە و گەڕانەوە بەغدا."

زانیاریی زیاتر: ئەو تیمە چەند تێبینییەکی کەمیان لەسەر داهاتی چەند وەزارەتێک هەبووە، هەروەها لەسەر دامەزراندن و داهاتەکان، بەڵام لەلایەن وەزارەتی دارایی ڕوونکردنەوەیان پێ دراوە، دامەزراندنی فەرمانبەر بە شێوەی گرێبەست بۆ پڕکردنەوەی ئەو بۆشاییانە بووە کە بەهۆی خانەنشینبوونی فەرمانبەران دروست بوون.

ئەوەی پێویستە بیزانیت: ئەمساڵ بۆ دووەم جارە تیمی دیوانی چاودێری دارایی عێراق، سەردانی هەرێمی کوردستان بکات، ساڵانە چەند جارێک دێن و پێداچوونەوە بە تەرازووی پێداچوونەوە - میزان موراجەعە دەکەن، واتا پێداچوونەوە دەکەن بە خەرجی و داهاتەکانی سەرجەم وەزارەت و فەرمانگەکانی حکومەت بەراوردی دەکەن بە داتاکانی وەزارەتی دارایی.