یەپەگە: سەرکەوتنی کۆبانی شۆڕشی ئیرادە و خۆڕاگریی بوو

ئاڤا نیوز

یەکینەکانی پاراستنی گەل (YPG) لە ساڵیادی سەرکەوتنی کۆبانییدا ڕایانگەیاند، ئەو سەرکەوتنە تەنها دەستکەوتێکی سەربازیی نەبوو، بەڵکو گوزارشت بوو لە ئیرادەی نەتەوەیی بۆ پاراستنی خاک و بەها مرۆییەکان لە بەرامبەر تێرۆر.

ڕاگەیێنراوی فەرمی: یەکینەکانی پاراستنی گەل لە ڕاگەیێنراوێکدا ئاماژەیان بەوە کرد: "سەرکەوتنی کۆبانی تەنها دەستکەوتێکی سەربازیی نەبوو، بەڵکو کۆبانی نوێنەرایەتیی شۆڕشی ئیرادە و خۆڕاگریی دەکرد لە دژی پڕۆژەی تاریکیی و تێرۆر؛ ئەو کات لەژێر گەمارۆیەکی تونددا بووین، بەڵام باوەڕبوون بە خاک وایکرد بەسەر تێرۆردا سەربکەوین".

زانیاریی زیاتر: لە کاتی گەمارۆدانی کۆبانی لە ساڵی 2014دا، شارەکە ڕووبەڕووی کارەساتێکی مرۆیی گەورە ببووەوە و پتر لە 200,000 کەس لە دانیشتووانەکەی ئاوارە بوون، بەڵام خۆڕاگریی شەڕڤانان سەرنجی تەواوی جیهانی بۆ لای خۆی ڕاکێشا.

٠ خاڵی یەکلاکەرەوەی ئەو جەنگە مێژووییە کاتێک بوو کە بە بڕیاری سەرۆک بارزانی، هێزێکی پشتیوانیی پێشمەرگەی کوردستان بە چەکی قورسەوە گەیشتنە شارەکە، کە ئەمەش هاوسەنگیی هێزی گۆڕی و بووە دەستپێکی تێکشکانی ئەفسانەی داعش لە ناوچەکەدا. قارەمانییەتی شەڕڤانان و پێشمەرگە پێکەوە لە کۆبانی، بووە بنەمایەک بۆ دروستبوونی هاوپەیمانێتییەکی نێودەوڵەتیی بەهێزتر و ناساندنی دۆزی کورد وەک هێزێکی سەرەکیی و کاریگەر لە پاراستنی ئاسایشی جیهانییدا.