سەرۆکایەتیی پەرلەمانی عێراق وادەی هەڵبژاردنی سەرۆککۆماری دیارییکرد

ئاڤا نیوز

سەرۆکایەتیی پەرلەمانی عێراق بڕیاریدا کاتژمێر 11:00ـی پێشنیوەڕۆی ڕۆژی سێشەممە (27-01-2026) کۆبوونەوەی تایبەت بە هەڵبژاردنی سەرۆککۆماری نوێ ئەنجام بدرێت.

ڕاگەیێنراوی فەرمی: سەرۆکایەتیی پەرلەمانی عێراق کارنامەی کۆبوونەوەی ڕۆژی سێشەممەی بڵاوکردەوە و ڕایگەیاند: کۆبوونەوەکە تەنها یەک بڕگە لەخۆدەگرێت، ئەویش بریتییە لە هەڵبژاردنی سەرۆککۆمار لەرێگەی دەنگدانی نهێنیی و ڕاستەوخۆی ئەندامانی ئەنجوومەنەوە.

زانیاریی زیاتر: بۆ وەرگرتنی پۆستی سەرۆککۆمار 19 کاندید کێبەرکێ دەکەن، کە بەگوێرەی عورفی سیاسیی پاش ساڵی 2003، ئەم پۆستە وەک پشکی کورد جێگیر کراوە.

ئەمەش بزانە: پڕۆسەی هەڵبژاردنەکە پێویستیی بە ئامادەبوونی دوو لەسەر سێی پەرلەمانتاران هەیە (220 پەرلەمانتار لە کۆی 329 ئەندام) تاوەکو نیسابی یاسایی تەواو بێت. کاندیدی سەرکەوتوو دەبێت لە خولی یەکەمدا دوو لەسەر سێی دەنگەکان بەدەستبهێنێت، ئەگەرنا کێبڕکێکە دەچێتە خولی دووەم لەنێوان ئەو دوو کاندیدەی زۆرترین دەنگیان هێناوە.