دەزگای پەروەردە و فێركردنی ئیدارەی خۆسەر سوپاسی مامۆستایان و قوتابیانی هەرێمی كوردستان دەکات

ئاڤا نیوز

دەزگای پەروەردە و فێركردن لە ڕۆژئاوای كوردستان، پێزانینی خۆی بۆ هەڵوێستی پاڵپشتیكارانەی مامۆستایان و قوتابیانی هەرێمی كوردستان دەردەبڕێت، کە ئەمڕۆ لە قوتابخانە حکومی و ناحکومییەکان چەندین چالاکی وەک هۆنینەوەی کەزی و بەرزکردنەوەی ئاڵای کوردستان بەڕێوەچوو.

چیرۆکی سەرەکی: دوای هێرش و پەلامارەكانی هێزەكانی سوپای عەرەبی سووریا بۆ سەر ڕۆژئاوای كوردستان، بەتایبەت دوای بڵاوبوونەوەی ڤیدیۆی ئەو چەكدارەی سوپای سووریا كە سووكایەتی بە كەزی خانمە شەڕڤانێكی شەهید دەكات، مامۆستایان و قوتابیان لە ناوچە جیاوازەكانی هەرێمی كوردستان بە هۆنینەوەی قژیان و بەرزكردنەوەی ئاڵای كوردستان بەدەم وتنەوەی دروشمی "یەك كەزی دەبڕنەوە، هەزارانی دیكە دەهۆنینەوە"، پشتیوانیی خۆیان بۆ ڕۆژئاوای كوردستان دەربڕی.

یاداشتنامەی فەرمی: دەزگای پەروەردە و فێرکردن لە ڕۆژئاوای کوردستان كە بەرپرسە لە سێكتەری پەروەردەی ناوچەكانی ژێر بەڕێوەبردنی ئیدارەی خۆسەر، لە یاداشتنامەیەكدا، سوپاسی هەڵوێستی پاڵپشتیكارانەی مامۆستایان و قوتابیان و وەزارەتی پەروەردەی هەرێمی كوردستان دەكات بۆ سازدانی چالاكیی جۆراوجۆر لەپێناو پشتیوانیكردنی كوردانی ڕۆژئاوا.

پەروەردەی ئیدارەی خۆسەر دووپاتیشی دەكاتەوە، هەڵوێستی مێژوویی خەڵك و سەركردایەتیی هەرێمی كوردستان بۆ پشتیوانیی ڕۆژئاوا هەرگیز لەیاد ناكرێت، ئەو هەڵوێستە دەرخەری ئەوە بوو؛ هەموو كورد لە پرسە چارەنووسسازەكان هاودەنگ و هاوهەڵوێستن.