چوارچێوەی هەماهەنگی وردەکاریی گفتوگۆکانی پێکهێنانی حکومەت بۆ ئاڤا ئاشکرا دەکات

ئاڤا نیوز

سەرکردەیەک لە چوارچێوەی هەماهەنگی ڕایدەگەیێنێت، نۆ کاندید بۆ پۆستی سەرۆکوەزیران خراونەتە بەردەم کوتلە سیاسییەکان. گفتوگۆیەکی چڕوپڕ لە نێوان هێزەکاندا بەردەوامە بۆ گەیشتن بە سازانێکی کۆتایی سەبارەت بە کاندیدێک کە مەرجی پێکهێنانی حکومەتی پێدەسپێردرێت، بەڵام تاوەکو ئێستا هیچ ناوێک یەکلا نەکراوەتەوە.

 

وێنە گەورەکە: مانگێک بەسەر هەڵبژاردن لە عێراق تێدەپەڕێت و لایەنە براوەکان بەردەوامن لە گفتوگۆکانیان لەبارەی پێکهێنانی حکومەتی نوێ و دابەشکردنی پۆست و ئەرکەکان.

 

لێدوانی فەرمی: عامر فایز، سەرۆکی هاوپەیمانیی تەسمیم و سەرکردە لە چوارچێوەی هەماهەنگی لە لێدوانێکی تایبەتدا بە ئاڤا میدیای ڕاگەیاند، محەممەد شیاع سوودانی و نوری مالیکی دوو کاندیدن لەناو ئەو نۆ ناوەدا و هیچ یەکێکیان لەوی دیکە نزیکتر نییە.

 

فایز ئەو هەواڵانەی ڕەتکردەوە کە باس لە پێدانی وەزارەتی نەوت بە پەرلەمانتارانی بەسرە دەکەن. هاوکات بە دووری زانی پەرلەمانتار عامر عەبدولجەبار کاندید بێت بۆ پۆستی سەرۆکوەزیران، چونکە "دەرفەتەکانی لاوازن" و ناوی لەناو ئەو نۆ کاندیدەدا نییە.

 

لەهەمان کاتدا: فایز دروستیی ئەو زانیارییانەی ڕەت کردەوە کە لە میدیاکاندا بڵاوبوونەتەوە سەبارەت بە "پێشکەشکردنی سێ ناو بە مەرجەعییەت و دەرچوونی وەڵامێک لەبارەیانەوە" و ئەو هەواڵانەی وەک "هەوڵێک بۆ کەم کردنەوەی متمانە" ناوبرد و پێشبینیشی ئەوەشی کرد کە پۆستی سەرۆکوەزیران لەم مانگەدا یەکلا بکرێتەوە.

 

لە لایەکی دیکەوە: سەرۆکی هاوپەیمانیی "تەسمیم" ڕوونیشی کردەوە کە "گفتوگۆکان هێشتا بەردەوامن بەبێ ڕێککەوتنێکی کۆتایی" سەبارەت بە هێزە سووننەکان و پرۆسەی هەڵبژاردنی سەرۆکی پەرلەمان، ئاماژەی بەوەشدا کە کۆبوونەوەیەکی دیاریکراو لە ماڵی موسەننا سامەڕائی لەوانەیە یارمەتیدەر بێت بۆ چارەسەرکردنی قەیرانەکە و گەیشتن بە سازانێک لە نێوان لایەنەکان.