گوتەبێژی پارتی: لەم ڕۆژانە كۆبوونەوەیەكی دیكەی پارتی و یەكێتی بەڕێوەدەچێت

ئاڤا نیوز

گوتەبێژی پارتی دیموكراتی كوردستان كۆنفرانسێكی ڕۆژنامەوانیدا لە وەڵامی پرسیاری پەیامنێری ئاڤا سەبارەت بە كۆبوونەوەی پارتی و یەكێتی و پێكهێنانی كابینەی تازەی حكومەتی هەرێمی كوردستان ڕایگەیاند: بەپێی ئەوەی لە ڕۆژانی ڕابردوو، هەردوو شاندی پارتی دیموكراتی كوردستان و یەكێتیی نیشتمانیی كوردستان، كۆبوونەوەیەكی نافەرمییان ئەنجام دابوو، لەم ڕۆژانە كۆبوونەوەیەكی دیكە بەڕێوەدەچێت.

وێنە گەورەکە: بۆ پێکهێنانی کابینەی دەیەمی حکومەتی کوردستان، پارتی و یەکێتی کۆبوونەوەکانیان دەستپێدەکەنەوە، لە ڕابردوو لەسەر زۆربەی وردەکارییەکانی کابینەکە ڕێککەوتوون، تەنیا دابەشکردنی پۆستەکان ماوە لەسەری ڕێکبکەون.

لێدوانی ڕۆژنامەوانی: مەحموود محەممەد، گوتەبێژی پارتی دیموكراتی كوردستان ڕایگەیاند، لەم دۆخەی ئێستادا پێمان باشە پۆستی وەزارەتی ناوخۆ هەر لای پارتی بمێنێتەوە، گوتیشی: لە كۆبوونەوە نافەرمییەکەی هەفتەی ڕابردووی شاندی پارتی و یەكێتی بڕیاریاندابوو كە چەند ڕۆژێك بوار بەیەك بدەن و هەندێك كار هەیە بیكەن ئینجا كۆببنەوە.

گوتەبێژی پارتی دیموكراتی كوردستان ڕاشیگەیاند: شاندی پارتی بە سەرۆكایەتیی هۆشیار زێباری بۆ پێكهێنانی كابینەی دەیەم بەردەوامە لە كارەكانی خۆی، دوای پەسەندكردنی ئەنجامی هەڵبژاردنەكانی عێراقیش لەلایەن دادگەی فیدراڵییەوە شاندی پێكهێنانی حكومەتی عێراقیشمان دەستبەكار دەبێت.

گوتەبێژی پارتی ئەمانەشی وت:

٠ ئێمە هەوڵمان داوە کورد یەکدەنگ بێت و بە یەک تیم بچێتە بەغدا، بەڵام وادیارە بابەتەكە هێشتا پێویستیی بە گفتوگۆی زیاترە.

٠ پێش بەڕێوەچوونی هەڵبژاردنی پەرلەمانی عێراق ئێمە هەر ڕامانگەیاندووە كە پێمان باشە بابەتی هەرێمی كوردستان و عێراق تێكەڵ نەكرێن و هەریەكێكیان بەشێوازێك چارەسەر بكرێن، بەڵام تاوەكوو ئێستا نەكراوە.

٠ پێشووتریش بە بەرپرسانی یەكێتیمان ڕاگەیاندووە كە لەوانەیە لە دابەشكردنی پۆستەكانی کابینەی دەیەم ژمارەی كورسی و ئەنجامی هەڵبژاردن لەبەرچاو نەگیرابێت، بەڵام پێویستە ئەوان و ئێمەیش دۆخی یەكتر لەبەرچاو بگرین.