جگە لە فڕۆکەخانەی سلێمانی فڕۆکەخانەکانی عێراق بەڕووی گەشتەکاندا کرانەوە

ئاڤا نیوز

وەزارەتی گواستنەوەی عێراق ڕایگەیاند، لەکۆی سێ فڕۆکەخانەی نێودەوڵەتی (بەغدا، سلێمانی و نەجەف) کە بەهۆی خراپی ڕەوشی کەشوهەوا داخرابوون، لەدوای کاتژمێر 12ـی نیوەڕۆی ئەمڕۆوە هەردوو فڕۆکەخانەی بەغدا و نەجەف کرانەوە و تەنیا فڕۆکەخانەی سلێمانی بە داخراوی ماوەتەوە.

چیرۆکی سەرەکی: بەهۆی خراپی ڕەوشی کەشوهەوا و دابەزینی ئاستی بینین، گەشتەکانی فڕۆکەخانە نێودەوڵەتییەکانی بەغدا، سلێمانی و نەجەف بەکاتی ڕاگیران.

لێدوانی فەرمی: مەیسەم سافی، وتەبێژی وەزارەتی گواستنەوەی عێراق بە ئاژانسی هەواڵی فەرمی ڕاگەیاند، لە ئێستادا گەشتی فڕۆکەخانە نێودەوڵەتییەکانی بەغدا و نەجەف ئاسایی بوونەتەوە، پێشتریش گەشتەکان لە فڕۆکەخانەی نێودەوڵەتی بەسرە ئاسایی بوون.

بەوپێیەش تا ئێستا ڕەوشی کەشوهەوا ڕێگەی بە ئاساییبوونەوەی گەشتەکان لە فڕۆکەخانەی نێودەوڵەتیی سلێمانی نادات و وەک تاکە فڕۆکەخانەی نێودەوڵەتیی عێراق بە داخراوی ماوەتەوە.