ئێران بڕیاری سزای لەسێدارەدانی خانمێکی سیاسیی کوردی هەڵوەشاندەوە

ئاڤا نیوز

دادگای باڵای ئێران سزای لەسێدارەدانی وەریشە مورادی، خانمە چالاکوانی سیاسیی کوردی هەڵوەشاندەوە.

چیرۆکی سەرەکی: وەریشە مورادی، زیندانی سیاسی کورد سزای لەسێدرەدانی بەسەردا سەپێنرابوو، ڕۆژی چوارشەممە پارێزەرەکەی هەڵوەشاندەوەی سزاکەی لەلایەن لقی 9ـی دادگای باڵای ئێرانەوە ڕاگەیاند.

ڕاگەیێنراوی فەرمی: مستەفا نیلی، پارێزەری وەریشە مورادی لە ئێکس ڕایگەیاند: دوای دووبارە پێداچوونەوە بە سزای لەسێدارەدانی وەریشە مورادی لەلایەن دادگای باڵای ئێران، بە هۆی کەموکوڕییەکانی لێکۆڵینەوە و پابەندنەبوون بە ڕێکارە یاساییەکان "ڕووننەکردنەوەی ئەو تۆمەتانەی کە سزای لەسێدارەدانەکەی لەسەر دراوە لە قۆناغەکانی لێکۆڵینەوەدا"، دادگای باڵای تاران سزای لەسێدارەدانەکەی هەڵوەشاندەوە.

باکگراوند: وەریشە موردای ناسراو بە "جوانە سنە"، خانمە چالاکوانێکی سیاسی کورد لە 01-08-2023 لە شاری سنەی ڕۆژهەڵاتی کوردستان دەستگیرکرا، دوای لێکۆڵینەوە لێی بۆ زیندانی ئەوین گواسترایەوە، دوای تێپەربوونی پێنج مانگ لە ژووری تاکەکەسی لە زیندان دواجار ناوبراو لەلایەن لقی 15ـی دادگای باڵای تاران تۆمەتی سیاسی سزای لەسێدارەدانی بەسەردا سەپێندرا.