هاتووچۆی چەمچەماڵ ئاگادارییەک ئاراستەی شۆفێرانی زیانلێکەوتوو دەکات

ئاڤا نیوز

بەڕێوەبەرایەتیی هاتووچۆی چەمچەماڵ ڕایدەگەیێنێت، ئەوانەی بەهۆی لافاوەوە زیان بەر ئۆتۆمبێلەکانیان کەوتووە، لە ڕێگەی فۆرمێکەوە دەتوانن ناویان تۆمار بکەن و ڕادەستی لیژنەی تایبەتمەندی بکەن.

چیرۆکی سەرەکی: ئەمڕۆ هەینی 12-12-2025، بەڕێوەبەرایەتیی هاتووچۆی چەمچەماڵ ئاگادارییەکی بڵاوکردەوە و تێیدا هاتووە کە لیژنەیەکیان پێکهێناوە بۆتۆمارکردنی ئەو ئۆتۆمبێلانەی بەهۆی لافاوەکەی چەمچەماڵ زیانیان بەرکەوتووە.

ڕاگەیێنراوی فەرمی: هاتووچۆی چەمچەماڵ ڕایگەیاند، "ئاگاداری هەموو ئەو هاووڵاتییانەی سنووری قەزای چەمچەماڵ دەکەینەوە کە بەهۆی لافاوی ڕۆژی 9-12-2025، ئۆتۆمبیلەکانیان زیانیان پێگەیشتووە، دەتوانن لە ڕێگەی فۆرمێکەوە زیان و جۆری ئۆتۆمبێلەکانیان تۆمار بکەن".

زانیاریی زیاتر: بەپێی ڕاگەیێنراوەکە، زیانلێکەوتووان دەتوانن لەمڕۆوە دەست بە پڕکردنەوەی فۆرمەکە بکەن و تاوەکو کۆتایی هەفتە بەردەوام دەبێت، دواتر لە بەشی هاتووچۆی چەمچەماڵ ڕادەستی لیژنەی تایبەتمەندی بکەن.

باکگراوند: سێشەممەی ڕابردوو، 9-12-2025 شەپۆلێکی بەهێزی بارزنبارین ڕووی لە ناوچەکانی هەرێمی کوردستان کرد و لە چەندین شوێن و ناوچەی جیاوازدا بەهۆی بارانی بەهێز و خوڕ لافاو دروست بوو و ئاو چووە نێو ماڵان و زیان بەر ماڵ و ئۆتۆمبێلەکانیان کەوت، بە تایبەت لە سنووری پارێزگای سلێمانی.