سەدر هۆشداری لە بڵاوبوونەوەی "ئاینی ئیبراهیمی" دەدات

ئاڤا نیوز

 

ڕێبەری ڕەوتی نیشتمانیی شیعە، لە پەیامێکی تونددا هۆشداری دەدات لە مەترسیی ئاساییکردنەوەی پەیوەندییەکان لەگەڵ ئیسرائیل و بڵاوبوونەوەی "ئایینی ئیبراهیمی" لە عێراق.

 

چیرۆکی سەرەکی: موقتەدا سەدر لە وتاری نووسراوی نوێژی هەینی ئەمڕۆدا کە بە دەستوخەتی خۆی نووسراوە و بەسەر وتاربێژانی ڕەوتەکەیدا دابەش کراوە، هێرشی توندی کردە سەر "گەندەڵکاران" بێ ئەوەی ناویان بهێنێت، ئەو پێیوایە گەندەڵکاران بە دزی و ملکەچی و خۆشەویستییان بۆ دەسەڵات، مەزهەبیان لاواز کردووە و خستوویانەتە بەردەم مەترسییەکی گەورەی ناوخۆیی و دەرەکی.

 

بەیاننامەی فەرمی: لە بەشێکی وتارەکەیدا سەدر دەڵێت: "ئاساییکردنەوەی پەیوەندییەکان لەگەڵ ئیسرائیل و  ئایینی ئیبراهیمی لەسەر دەرگان، موجاهید بووەتە تیرۆریست و تیرۆریست بووەتە دۆست، گەندەڵی بووەتە خوو و ستەم بووەتە بەرنامە، ئەوانەشی کە بانگەشەی پەیوەندی بە ئێمە و بنەماڵەی سەدرەوە دەکەن، ئێمە لێیان بێبەریین تا ڕۆژی دوایی".

لە لایەکی دیکەوە: پێشتر سەدر داوای سازکردنی نوێژی هەینیی یەکگرتووی ملیۆنیی لە پارێزگای بابل کردبوو، بەڵام دواتر بەهۆی خراپیی کەشوهەوا و بارانبارینی بەخوڕ کە بووە هۆی دروستبوونی لافاو لە چەندین ناوچە و شاری عێراق، بڕیارەکە هەڵوەشایەوە.

سەدر جەختی کردەوە کە نوێژی هەینی هەمیشە وەک دڕکێک بووە لە چاوی داگیرکەران و گەندەڵکاران و تیرۆریستان، هەروەها دڕکێکە لە چاوی ئەوانەی لەبەردەم فشارەکانی ئەمریکا و زایۆنیزمدا ملکەچ بوون.