سەرۆککۆماری عێراق بۆ هاوتا ئێرانییەکەی: ئیسرائیل سەرچاوەی سەرەکیی ناسەقامگیریی ناوچەکەیە

ئاڤا نیوز

د. لەتیف ڕەشید، سەرۆککۆماری عێراق لە دیدارێکی لەگەڵ مەسعود پزیشکیان، هاوتا ئێرانییەکەی ڕایگەیاند، ئاسایشی عێراق وابستەی ئاسایشی ئێرانە. ئەوەشی خستەڕوو کە ئیسرائیل و کردەوەکانی "زەرەمەندترین فاکتەری ناسەقامگیریی ناوچەکەن".

 

چیرۆکی سەرەکی: هەردوو سەرۆککۆماری عێراق و ئێران لە پەراوێزی کۆنفرانسی نێودەوڵەتیی "ئاشتی و متمانە" لە شاری عیشق ئاباد لە وڵاتی تورکمانستان کۆبوونەوە.

 

ڕاگەیێنراوی فەرمی: بەگوێرەی میدیاکانی ئێران، لەتیف ڕەشید جەختی کردەوە، دەستدرێژیی ئیسرائیل بۆ سەر فەڵەستین و وڵاتانی ناوچەکە بە ئێرانیشەوە، پێویستی بە ڕۆڵ و گرتنەبەری هەڵوێستی ڕوون و چارەنووسساز لە بەرامبەر ئەم هێرشانەدا هەیە.

 

-ئیسرائیل هۆکاری سەرەکیی قەیرانەکانی ناوچەکەیە نەک تەنیا لە ڕێگەی دەستدرێژی سەربازییەوە، بەڵکو لە ڕێگەی کردەوە بازرگانی و ئابوورییەکانییەوە کە ڕێگری لە پەیوەندییە بونیادنەرەکان دەکات لە نێوان وڵاتانی ناوچەکەدا.

 

- سەرۆکی عێراق بە پزیشکیانی وتوە: "دەبێت وڵاتانی ناوچەکە بەتایبەتی ئێران و عێراق هەڵمەتێکی بەهێز و کاریگەر لە چوارچێوەی ئەوروپا و نەتەوەیەکگرتووەکان پێکبهێنن بۆ ئەوەی بەڕوونی هەڵوێستەکانیان سەبارەت بە هەڕەشەکانی ئیسرائیل بخەنەڕوو".

 

لەلایەکی دیکەوە: پزیشکیان ئیسرائیلی بە "وەرەمە شێرپەنجەییەکان" وەسف کردووە و ئاماژەی بەوە کردووە ئیسرائیل ڕۆڵی تێکدەرانەی لە ناوچەکەدا هەیە و جەختی لەوە کردەوە کە "ئەم قەوارەیە هەوڵدەدات پێش بە برەودانی پەیوەندییە زانستی، کولتووری، ئابووری، سیاسی و پیشەسازییەکانی نێوان وڵاتانی ئیسلامی بگرێت و پاڵ بە هەڵگیرسانی شەڕی نەتەوەیی و تائیفی دەنێت".

 

-سەرۆککۆماری ئێران پێداگری لەسەر پەرۆشی وڵاتەکەی بۆ پەرەپێدانی پەیوەندییە ئابووری، بازرگانی و ئەمنییەکان لەگەڵ عێراق کردەوە و ئاماژەی بەوەدا کە تەواوکردنی پڕۆژەی بەستنی هێڵی ئاسنی نێوان بەسرە و شەلەمچە کارێکی سەرەکییە بۆ تاران لەپێناو بەرزکردنەوەی پەیوەندییەکانی نێوان هەردوو وڵات.