لافاو چوار ملیۆن دیناری ژن و پیاوێکی بەتەمەن و هەژاری تەکیە دەبات

ئاڤا نیوز

 

ژن و پیاوێکی بەتەمەن چوار ملیۆن دینار کە بۆ خەرجی نەخۆشی خۆیان هەڵیان گرتبوو لە لافاوەکەی چەمچەماڵ و دەوروبەری لافاو دەیبات و خۆشیان بە موعجیزە ڕزگاریان دەبێت.

 

چیرۆکی سەرەکی: لە ناحیەی تەکیە، خێزانێکی کەم دەرامەت لە ڕێگەی مایکی ئاڤا میدیاوە داوای هاوکاری دەکەن، ئەوان ژن و پیاوێکی بەساڵاچوون، لە ژوورێکی سارد و سڕ ژیان دەکەن، بەهۆی لافاوەوە هیچ شتێکیان لە ماڵەکەیان نەماوە و پیاوەکەش بەهۆی نەخۆشییەوە لە ناو جێگە کەوتووە.

 

لێدوانی فەرمی: ئەو ژنە بەتەمەنە قسەی بۆ چۆمان مەحموود، پەیامنێری ئاڤا میدیا کرد و وتی: ماڵەکەمان لافاو بردی هیچ شتێکمان بۆ دەرنەچووە، چوار ملیۆن دینارمان کۆکردبۆوە بۆ ئەوەی لە کاتی پێویستی و نەخۆشی سوودی لێوەرگرین بەڵام وەک هەموو کەلوپەلەکانی دیکە لافاو بردی.

 

- چوار مانگە لەو ژوورە نەهاتوومەتە دەرەوە، لە کاتی لافاوەکە بە موعجیزە ڕزگارمان بوو، دراوسێیەکانمان ڕزگاری کردین، داوا دەکەین خەڵک هاوکاریمان بکەن، پارە، خواردن، سەلاجە، فەرش و زۆپامان بۆ بێنن.

 

ئەوەی ئێستا ڕوودەدات: ئاڤا میدیا کەمپەینێکی ڕاگەیاندووە و تا دوو ڕۆژی دیکە بەردەوام دەبێت، هەر دوای ڕاگەیاندنی کەمپەینەکە خەڵکی هەولێر بە لێشاو کۆمەک و هاوکارییان گەیاندە کەمپەینەکە و تا ئێستاش بەردەوام خەڵک هاوکاری و پێداویستییەکان دێنن.

 

باکگراوند: بەهۆی شەپۆلێکی بارانبارینی بە خوور و درووستبوونی لافاو لە چەندین شوێن و ناوچەی جیاوازدا لافاو دروست بوو و ئاو چووە نێو ماڵان و زیانێکی زۆر بەر سەدان ماڵ کەوتووە و زیانی گیانی و ماددی لێ کەوتووەتەوە.