بە هەزاران بەکارهێنەری ماددەی هۆشبەر تێکەڵ بە کۆمەڵگە دەکرێنەوە

ئاڤا نیوز

 

دوای بڕیاری دادوەر بۆ چارەسەرکردنیان لە سەنتەرەکانی چاکسازی لە بری زیندانیکردن، شەش هەزار بەکارهێنەری ماددەی هۆشبەر تێکەڵ بە کۆمەڵگە دەکرێنەوە.

 

وێنە گەورەکە: وەزارەتی ناوخۆی عێراق 16 سەنتەری تایبەت بە چاکسازیی کردووەتەوە، کە سێ سەنتەریان لە بەغدایە و ئەوانی دیکەش بەسەر پارێزگاکانی دیکەدا دابەش بوون.

 

لێدوانی فەرمی: عەمید زیاد قەیسی، بەڕێوەبەری ڕاگەیاندنی بەڕێوەبەرایەتیی گشتیی کاروباری ماددە هۆشبەرەکانی عێراق ڕایگەیاند: لە ماوەی ڕابردوودا ئەم سەنتەرانە پێشوازییان لە شەش هەزار ئالوودەبووی ماددەی هۆشبەر کردووە و خستوویاننەتە ژێر بەرنامەیەکی چڕی چارەسەرییەوە، کە بریتی بووە لە، پاڵپشتیی دەروونی، بەرنامەی خۆراکی، چاودێریی پزیشکی، ئەنجامدانی وەرزش و فێربوونی پیشە و کاری دەستی؛ ئەمەش بووەتە هۆی ئەوەی بە تەواوی چاک ببنەوە و وەک ئەندامێکی کارا بگەڕێنەوە ناو کۆمەڵگە.

 

زانیاریی زیاتر: قەیسی ئاماژەی بەوەدا، شێوازی کارکردن لەم سەنتەرانە بە هەماهەنگیی تەواو لەگەڵ ئەنجوومەنی باڵای دادوەری بەڕێوە دەچێت، ئەوەش لە ڕێگەی کاراکردنی ماددەکانی 32 و 39 لە یاسای ماددە هۆشبەرەکان، چونکە بەپێی ئەم یاسایە دادوەرەکان وەک قوربانی سەیری بەکارهێنەران دەکەن، بۆیە بۆ وەرگرتنی چارەسەر لە جیاتی زیندان، ڕەوانەی سەنتەرەکانی چاکسازی دەکرێن.

 

ئەمەش بزانە: لە ماوەی سێ ساڵی ڕابردوودا، بەڕێوەبەرایەتیی گشتیی کاروباری ماددە هۆشبەرەکان لە وەزارەتی ناوخۆی عێراق 230 تۆڕی بازرگانیی ماددەی هۆشبەری هەڵوەشاندووەتەوە، کە 27 تۆڕیان نێودەوڵەتی بوون، لە هەمان کاتدا 43 هەزار بازرگان و هەڵگری ماددەی هۆشبەر دەستگیر کراون کە 150 کەسیان بیانی بوون، هەروەها دەست بەسەر 28 تۆن ماددەی هۆشبەر و ملیۆنان حەبی دیکەی لەو جۆرەدا گیراوە.