سکرتێری گشتیی نەتەوەیەکگرتووەکان سەردانی بەغدا دەکات

ئاڤا نیوز

بە مەبەستی بەشداریکردن لە ڕێوڕەسمی ڕاگەیاندنی کۆتاییهاتنی ئەرکی تیمی نەتەوەیەکگرتووەکان بۆ یارمەتیدانی عێراق (یونامی)، سکرتێری گشتیی نەتەوەیەکگرتووەکان سەردانی بەغدا.

 
ئەوەی پێویستە بیزانیت: بەگوێرەی بڕیاری ئەنجوومەنی ئاساییشی نەتەوەیەکگرتووەکان، ئەرکی تیمی نەتەوەیەکگرتووەکان بۆ یارمەتیدانی عێراق (یونامی) لە کۆتایی ئەمساڵدا تەواودەبێت و هەموو کارەکانی یونامی ڕادەگیرێن.

 

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق بڕیارە ئەمڕۆ شەممە 2025-12-13، ئەنتۆنیۆ گۆتێرێس، سکرتێری گشتینەتەوەیەکگرتووەکان بگاتە بەغدا بە مەبەستی بەشداریکردن لە ڕێوڕەسمی ڕاگەیاندنی کۆتاییهاتنی ئەرکی ئەرکی تیمی نەتەوەیەکگرتووەکان بۆ یارمەتیدانی عێراق (یونامی).

 

لەلایەکی دیکەوە: سەرچاوەیەک بە ئاژانسی فەرمیی ڕاگەیاند، وادەی سەردانەکەی گۆتێرێس بەهۆی خراپیی کەشوهەواوە دواکەوتووە.

 

ئەوەی لەوبارەیەوە دەگوترێت: بەر لە سەردانەکەی گۆتێریس، محەممەد ئەلحەسسان، نوێنەری تایبەتی سکرتێری گشتیی نەتەوەیەکگرتووەکان و سەرۆکی نێردەی نەتەوەیەکگرتووەکان بۆ هاریکاریکردنی عێراق (یونامی) ڕایگەیاند، نێردەکە لە 31ی کانوونی یەکەمی 2025 بە یەکجاری عێراق جێدەهێڵێت.

 

لەهەمان کاتدا: ئەلحەسسان دووپاتی کردەوە کە چوونە دەرەوەی نێردەکە بە مانای نەبوونی نەتەوەیەکگرتووەکان نییە لە عێراق، بەڵکو دەزگا تایبەتمەندەکانیان چالاک دەمێننەوە لە بوارەکانی تەندروستی، پەروەردە، تەکنەلۆجیا، کەشوهەوا، و ئابووریدا.

 

ئەمەش بزانە: نێردەی یونامی لە ساڵی 2003 بە بڕیارێکی ئەنجوومەنی ئاسایش دامەزرا و بە فەرمی بڕیاردرا کە لە 31ی کانوونی یەکەمی 2025 کۆتایی بە ئەرکەکانی بهێنرێت، دوای درێژکردنەوەی کۆتایی و بەپێی داوای حکومەتی عێراق.