سکرتێری گشتیی نەتەوە یەکگرتووەکان گەیشتە بەغدا

ئاڤا نیوز

سکرتێری گشتیی نەتەوەیەکگرتووەکان، گەیشتە بەغدای پایتەخت، بە مەبەستی بەشداریکردن لە ڕێوڕەسمی ڕاگەیاندنی فەرمیی کۆتاییهاتنی ئەرکەکانی نێردەی نەتەوە یەکگرتووەکان لە عێراق (یونامی).

چیرۆکی سەرەکی: شەممە 2025-12-13، ئەنتۆنیۆ گۆتێرێس، سکرتێری گشتیی نەتەوە یەکگرتووەکان لە فڕۆکەخانەی نێودەوڵەتی بەغدا لەلایەن فوئاد حوسێن، وەزیری دەرەوەی عێراق و محەممەد ئەلحەسسان، سەرۆکی نێردەی یونامییەوە پێشوازی لێکرا.

ئەوەی پێویستە بیزانیت: نێردەی یونامی لە ساڵی 2003 بە بڕیارێکی ئەنجوومەنی ئاسایش دامەزرا و بڕیارە بە فەرمی لە 31ی کانوونی یەکەمی 2025 کۆتایی بە ئەرکەکانی بهێنرێت، ئەمەش دوای درێژکردنەوەی کۆتایی و بە داوای حکومەتی عێراق دێت. ئەم سەردانە نیشانەی قۆناغێکی نوێیە لە پەیوەندییەکانی نێوان عێراق و نەتەوە یەکگرتووەکان.

ئەوەی لەوبارەیەوە دەگوترێت: بەر لە سەردانەکەی گۆتێریس، محەممەد ئەلحەسسان، نوێنەری تایبەتی سکرتێری گشتیی نەتەوە یەکگرتووەکان و سەرۆکی نێردەی نەتەوە یەکگرتووەکان بۆ هاریکاریکردنی عێراق (یونامی) ڕایگەیاند، نێردەکە لە 31ی کانوونی یەکەمی 2025 بە یەکجاری عێراق جێدەهێڵێت.

لەهەمان کاتدا: ئەلحەسسان دووپاتی کردەوە کە چوونەدەرەوەی نێردەکە بە مانای نەبوونی نەتەوە یەکگرتووەکان نییە لە عێراق، بەڵکو دەزگا تایبەتمەندەکانیان چالاک دەمێننەوە لە بوارەکانی تەندروستی، پەروەردە، تەکنەلۆجیا، کەشوهەوا، و ئابووریدا.