پارەی کۆکراوەی هەڵمەتی ئاڤا میدیا یەک ملیار دیناری تێپەڕاند

ئاڤا نیوز

سەرمایەداران و خێرخوازان زیاتر لە یەک ملیار دیناریان بەخشیوەتە هەڵمەتی ئاڤا میدیا بۆ کۆکردنەوەی هاوکاری بۆ لێقەوماوانی چەمچەماڵ، تەکیە و شۆڕش.

وێنە گەورەکە: هەڵمەتی هاوکاریی ئاڤا بۆ کۆکردنەوەی پارە و پێداویستی ناوماڵ بۆ لێقەوماوانی لافاوەکەی چەمچەماڵ، تەکیە و شۆڕش تاوەکو کاتژمێر 12:00ـی ئەمشەو بەردەوام دەبێت.

زانیاریی زیاتر: ژمارەیەک سەرمایەداری گەورەی کوردستان و سەدان خێرخواز بە زیاتر لە یەک ملیار دینار پارەی کاش بەشدارییان لە هەڵمەتەکەدا کردووە. تا ئێستاش نزیکەی 15 بارهەڵگر خۆراک و کەلوپەل و پێداویستی ناوماڵ کۆکراوەتەوە.

 

ئەوەی ئێستا ڕوودەدات: ئێوارەی ئەمڕۆ یەکەم کاروانی هاوکارییەکانی هەڵمەتی ئاڤا بەرەو چەمچەماڵ، تەکیە و شۆڕش بەڕێکەوت. ئێستا چەند بارهەڵگرێک گەیشتوون و لە تەکیە و شۆڕش دەست بە دابەشکردنی هاوکارییەکان کراوە. سبەی یەکشەممەش کاروانی هاوکارییەکان بەردەوام دەبێت.