سوننەکان کۆبوونەوەیەکی یەکلایکەرەوە بۆ دیاریکردنی سەرۆکی پەرلەمان دەکەن

ئاڤا نیوز

بڕیارە ئەمڕۆ یەکشەممە، "ئەنجوومەنی سیاسی نیشتمانی" کە نوێنەرایەتیی لایەنە سوننەکان دەکات، کۆبوونەوەیەکی چارەنووسساز ئەنجام بدات بۆ هەڵبژاردنی کاندیدێک بۆ پۆستی سەرۆکی داهاتووی پەرلەمان.

وێنە گەورەکە: زیاتر لە مانگێکە هەڵبژاردنی پەرلەمان کراوە، لایەنە براوەکان بەردەوامن لە گفتوگۆکانیان لەبارەی پێکهێنانی حکومەتی نوێ و دابەشکردنی پۆست و ئەرکەکان، پۆستی سەرۆکی پەرلەمان بەپێی پشک پشکێنە بۆ سوننەکانە و لەمبارەیەوە هێزە براوەکانی سوننە لە گفتوگۆ و دانوستاندان بۆ دیاریکردنی ناوێک بۆ پۆستەکە.

لێدوانی فەرمی: د.سەڵاح مەرعاوی، ئەندامی هاوپەیمانی "عەزم" بە سەرۆکایەتیی موسەننا سامەڕایی ئاشکرای کردووە، کۆبوونەوەکەی سەرکردەکانی ئەنجوومەنی سیاسیی نیشتمانی بڕیارە لە بارەگای سەرۆکی موسەننا سامەڕایی بکرێت، ئامانجی کۆتاییهێنانە بە هەڵبژاردنی یەک یان دوو کاندید بۆ پۆستی سەرۆکی پەرلەمان"، ئاماژەی بەوەدا "تا ئێستا گفتوگۆکان بەردەوامن و تا ئێستا هیچ ڕێککەوتنێک لەسەر ناوەکان نەکراوە.

لەلایەکی دیکەوە: سەڵاح کوبەیسی، ئەندامی هاوپەیمانی "سیادە" ڕایگەیاندووە، پێنج لایەنەکەی "ئەنجوومەنی سیاسیی نیشتمانی" هێشتا لە پرۆسەی گەیشتن بە لێکتێگەیشتندان بۆ هەڵبژاردنی کاندیدی گونجاو بۆ سەرۆکایەتیی پەرلەمان، جەختیشی کردەوە کە زۆربەی لایەنەکان کاندیدیان هەیە، هاوکات ئاماژەی بەوەشدا، لێکتێگەیشتن و هاوبەشی نێوان لایەنەکان زیاترە لە ناکۆکییەکانی پێشوو.

زانیاریی زیاتر: ئەمەش لە کاتێکدایە، دوێنێ شەممە، فایەق زێدان، سەرۆکی ئەنجوومەنی باڵای دادوەری داوای لە هەموو هێز و کەسایەتییە سیاسییە پەیوەندیدارەکان کرد کە پابەندی ئیرادەی پاکی نیشتمانی بن لە جێبەجێکردنی مەرجە دەستوورییەکان بۆ هەڵبژاردنی سێ سەرۆکایەتییەکە(سەرۆککۆمار، سەرۆکوەزیران و سەرۆکی پەرلەمان).