هاتووچۆی عێراق چەند ڕێنماییەک بۆ شۆفێران دەخاتەڕوو

ئاڤا نیوز

بەڕێوەبەرایەتیی گشتیی هاتووچۆی عێراق داوا لە شۆفێران دەکات لە کاتی شەو و بەیانی زوودا گرنگی بە بارودۆخی کەشوهەوا بدەن لەم ماوەیەدا، بەهۆی بوونی تەمی چڕ و خراپی بینین.

وێنە گەورەکە: لە هەفتەی ڕابردووەوە شەپۆلێکی بارانبارین عێراق بە هەرێمی کوردستانیشەوە گرتووەتەوە و  کاریگەرییەکانی ئەو شەپۆلە تا ئێستاش بەردەوامە، بەو هۆیەوە لە چەندین ناوچە دەبێتە تەم و حکومەتی هۆشداریی دەداتە شۆفێران پابەندی ڕێنماییەکانی سەلامەتی بن.

ڕاگەیێنراوی فەرمی: بەڕێوەبەرایەتییەکە لە ڕاگەیێنروێکدا، داوا لە هەموو شۆفێران دەکات، لەکاتی گەشتکردنیان لەنێوان پارێزگاکان و لەسەر ڕێگاوبانەکان و ڕێگاکانی دەرەوە، ڕێوشوێنی خۆپارێزی بگرنەبەر، دووربکەونەوە لە تێپەڕاندنی سنووری خێرایی، مەودای سەلامەتی نێوان ئۆتۆمبێلەکان بپارێزن، هاوکات گڵۆپی پێشەوە و گڵۆپی دواوە و گڵۆپی ئاگادارکردنەوەیان چالاک بکەن.

هاتووچۆی عێراق دەڵێت: "لەئێستادا مەفرەزەکانی بەڕێوەبەرایەتیی هاتووچۆی گەڕۆک سەرقاڵی بەکارهێنانی فلتەری هاتووچۆن بۆ ڕێنماییکردنی ئۆتۆمبێلەکان و بەیاوەریکردنیان لەسەر ڕێگاکانی دەرەوە بۆ گەیشتن بە سەلامەتی و ڕێگریکردن لە ڕووداوی هاتووچۆ بۆ سەلامەتی سەرجەم بەکارهێنەرانی ڕێگاوبان".