کۆمیسیۆن داواکارییەک ئاراستەی وەزارەتی دارایی عێراق دەکات

ئاڤا نیوز

کۆمیسیۆنی باڵای سەربەخۆیی هەڵبژاردنەکانی عێراق داوای لە وەزارەتی دارایی عێراق کردووە پەلە بکات لە خەرجکردنی شایستە داراییەکانی فەرمانبەرانی ڕۆژی دەنگدان.

وێنە گەورەکە: ڕۆژی سێشەممە، 11-11-2025، هەڵبژاردنی گشتیی بۆ خولی شەشەمی پەرلەمانی عێراق بەڕێوەچوو، 12 ملیۆن کەس بەشدارییان لە پرۆسەی دەنگدان کرد، کە لەلایەن هەزاران کارمەندیی کاتییەوە پرۆسە سەرپەرشتی کرا. 

ئەوەی پێویستە بیزانیت: ڕۆژی دووشەممە، کۆمیسیۆنی باڵای سەربەخۆی هەڵبژاردنەکان داوایەکی ئاڕاستەی وەزارەتی دارایی کرد، بۆ ئەوەی پەلە بکات لە دابینکردنی بودجە و خەرجکردنی مووچەی ئەو کارمەندانەی کە لە پرۆسەی هەڵبژاردن کاریان کردووە، ئەم داوایە لە کاتێکدایە کە کۆمیسیۆن جەختی لەوە کردووەتەوە کە سەرجەم رێکارە کارگێڕی و داراییەکانی تایبەت بەم پرسەی تەواو کردووە و بەگوێرەی رێکارە کارگێڕییە پەسەندکراوەکان ڕەوانەی وەزارەتی دارایی کردوون.

لە لایەکی دیکەوە: ئەم داوایەی کۆمیسیۆن لە کاتێکدایە ماوەیەکی زۆر تێپەڕیوە بەسەر ئەنجامدانی پرۆسەی هەڵبژاردن و تاوەکو ئێستا شایستەی داراییان بۆ خەرج نەکراوە.