بەهۆی دروستبوونی تەمەوە پارێزگایەکی عێراق کاتژمێرێک دەوام کەمدەکاتەوە

ئاڤا نیوز

بەهۆی نالەباریی کەشوهەوا و تەمومژەوە پارێزگای موسەننا بڕیاریدا ئەمڕۆ سێشەممە تاوەکو پێنجشەممە لە سەرجەم دامودەزگا حکومییەکان پارێزگاکە دەوامی بەیانیان بۆ یەک کاتژمێر کەمبکاتەوە.

وێنە گەورەکە: لە هەفتەی ڕابردووەوە شەپۆلێکی بارانبارین عێراق و هەرێمی کوردستانیشی گرتووەتەوە و  کاریگەرییەکانی ئەو شەپۆلە تا ئێستاش بەردەوامە، بەو هۆیەوە لە چەندین ناوچە دەبێتە تەمومژ و مەترسی لەسەر هاووڵاتییان بە تایبەتی شۆفێران دروست دەکات.

ڕاگەیێنراوی فەرمی: نووسینگەی موهەنەد عیتابی، پارێزگاری موسەننا ڕایگەیاند: بڕیاردراوە دەوامی بەیانیان بۆ ماوەی سێ ڕۆژ دوابخرێت بۆ کاتژمێر 09:00ی بەیانی، لە ڕۆژی سێشەممە 16ی کانوونی دووەمەوە تا پێنجشەممە 18ی کانوونی دووەم، لە سەرجەم دامودەزگا حکومی و پەروەردەییەکانی پارێزگاکە.

هۆکارە زانراوەکان: بەگوێرەی ڕاگەیێنراوەکەدا، بڕیارەکە بە پشتبەستن بە پێشبینییەکانی کەشناسی بەهۆی بارودۆخی کەشوهەوا و چڕی پێشبینیکراوی تەمومژ لە چەند ڕۆژی داهاتوودا بووە ئەوەش لەپێناو سەلامەتیی هاووڵاتییان.