کۆمپانیای هێڵی ئاسمانی نیشتمانی ئێران کەوتووەتەوە ناو قەیرانێکی قورسی دارایی

ئاڤا نیوز

بەگوتەی بەڕێوەبەری جێبەجێکاری کۆمپانیای (ئێران ئەیر) بێت، کۆمپانیاکە 15 ملیۆن دۆلاری هەریەکە لە فڕۆکەخانەکانی ئەستەنبووڵ نەجەف، دوبەی، جەددە و مەدینە قەرزارە و ژمارەیەکی زۆری فڕۆکەکانی وەستاون.

وێنە گەورەکە: هێڵی ئاسمانی نیشتمانی ئێران لە ساڵی 1944 لەلایەن دوو سەرمایەداری ئێرانیەوە دامەزراوە، سەرەتای گەشتەکانی لە ناوخۆی وڵات بووە دواتر گەشتەکانی زیادیان کردووە و بە یەکەم کۆمپانیای هێڵی ئاسمانی دادەنرێت کە ئاڵای ئێرانی کردووە بە لۆگۆی خۆی.

لێدوانی فەرمی: تاهیر عەبدولحەی، بەڕێوەبەری جێبەجێکاری کۆمپانیای ئێران ئەیر دەڵێت، بەهۆی شەڕی 12 ڕۆژی نێوان ئێران و ئیسرائیل و سەپاندنی قەدەغەی فڕین بەڕێژەی %50 لە ئاسمانی ئێران وایکردووە داهاتی کۆمپانیاکە کەمبێتەوە، ئەمەش کاریگەری لەسەر داهات و خەرجی کۆمپانیاکە هەبووە.

تاهیر عەبدولحەی دەشڵێت: ئێستا 15 ملیۆن دۆلاری پێنج فڕۆکەخانە قەرزارین، لە کۆی 20 فڕۆکە تەنیا هەشت فڕۆکە لە گەشتکردن بەردەوامن و قەبارەی قەرزەکان گەیشتووەتە 43 ترلیۆن تومەنی ئێرانی کە هاوتایە بە 15 ملیۆن دۆلاری ئەمریکی. ئەمەش قورسترین قەیرانی ئەو کۆمپانیایەیە لەماوەی 11 ساڵی ڕابردوو دووچاری هاتووە. 

ئەوەی پێویستە بیزانیت: بەگوێرەی ڕاپۆرتێکی ماڵپەڕی ئێران ئینتەرناشناڵ، لەماوەی ڕابردوودا فڕۆکەخانەکانی ئەستەنبووڵ چەندینجار گەشتی ئەو کۆمپانیایەیان بەهۆی قەرزارییەوە هەڵوەشاندوەتەوە.