بەتەمەنترین کەس سەرۆکایەتیی یەکەمین دانیشتنی پەرلەمان دەکات

ئاڤا نیوز

 

لیژنەیەکی باڵا بۆ ئامادەکاریی یەکەمین دانیشتنی خولی شەشەمی پەرلەمانی عێراق پێکهێنراوە و عامر فائز، کاندیدی دەرچووی پەرلەمان لە بازنەی بەسڕە بەتەمەنترین کاندیدی دەرچووە و سەرۆکایەتی یەکەمین دانیشتنی پەرلەمان دەکات.

 

ئەوەی پێویستە بیزانیت: ئەمڕۆ د. لەتیف ڕەشید، سەرۆککۆماری عێراق داوای لە خولی شەشەمی پەرلەمانی عێراق کرد 29ی ئەم مانگە یەکەمین دانیشتنی خۆی ساز بکات.

لێدوانی فەرمی: سەفوان گەرگەری، ئەمینداری گشتیی پەرلەمان بە میدیای فەرمی عێراقی ڕاگەیاند، ئەمیندارییەتی گشتیی پەرلەمان لیژنەیەکی پێکهێناوە کە من سەرۆکایەتی دەکەم و نوێنەری سەرجەم فەرمانگە پەیوەندیدارەکانی تێدایە.

 

-ئەرکی لیژنەکە ئامادەکارییە بۆ یەکەمین دانیشتنی خولی نوێی پەرلەمان، بۆیەش داوا لە سەرجەم فەرمانگەکانی پەرلەمان کراوە ئامادەکارییە تەکنیکییەکان دەستپێبکەن.

 

-لیژنە باڵاکەی پەرلەمان هەفتەی داهاتوو کۆبوونەوەکانی بۆ ئامادەکاریی بۆ یەکەمین دانیشتنی پەرلەمان لە 29ی ئەم مانگەدا دەست پێ دەکات، فەرمانگەکانی ڕاگەیاندن، پەیوەندییەکان، دەنگ و ئامادەکارییەکان ئەمنییەکانیش بەباشترین شێوە دەست بە کارەکانیان دەکەن.

 

زانیاریی زیاتر: ئەمینداری گشتیی پەرلەمان دەشڵێت، عامر فایز کاندیدی دەرچووی هاوپەیمانیی تەسمیم لە پارێزگای بەسڕە، بەتەمەنترین کاندیدی دەرچووی خولی تازەی پەرلەمانە و سەرۆکایەتیی یەکەمین دانیشتن دەکات، ناوبراو لە دایکبووی ساڵی 1948 ـە و ئێستا تەمەنی 77 ساڵە.