ڕێکخراوی مافەکانی مرۆڤ: چەکدارەکان ناهێڵن ئاوارەکانی ڕۆژئاوای کوردستان بگەڕێنەوە

ئاڤا نیوز

ڕێکخراوی مافەکانی مرۆڤ لە سووریا دەڵێت، بوونی گرووپە چەکدارەکان بەربەستە لە گەڕانەوەی ئاوارەکان بۆ زێدی خۆیان لە ناوچەکانی ڕۆژئاوای کوردستان، هاوکات جەختی لەسەر پێویستی دەرکردنی ئەو گرووپانە و دەستەبەرکردنی گەڕانەوەی سەلامەتی بۆ ئاوارەکان لەژێر چاودێریی نێودەوڵەتیدا کردەوە.

 

وێنە گەورەکە: لە ساڵی 2018 بە دواوە گرووپە چەکدارەکانی نزیک لە تورکیا بە هاوکاریی ئەو وڵاتە چەندین ناوچەیان لە ڕۆژئاوای کوردستان داگیر کرد، بەهۆیەوە هەزاران خێزان ئاوارەی ناوچەکانی دیکە بوون، تاوەکو ئێستا نەیانتوانیوە بگەڕێنەوە شارە و گوندەکانیان.

 

لێدوانی فەرمی: ئەڤین جومعە، ئەندامی ڕێکخراوی مافەکانی مرۆڤ لە سووریا ڕایگەیاند: بوونی گروپە چەکدارە بەکرێگیراوەکان لە ناوچەکانی سەرێ کانی، گرێ سپی، عەفرین، مەنبج، تەل ڕەفعەت، شەهبا هۆکاری سەرەکیی ئاوارەبوونی دانیشتووان بووە، لە سەرەتاوە تا ئەمڕۆش ڕێگری دەکەن لە گەڕانەوەیان بۆ سەر ماڵ و زێدی خۆیان.

 

ئەوەی ئێستا ڕوودەدات: ناوبراو ئاماژەی بەوەشکرد، گەڕانەوەی ئاوارەکان ڕووبەڕووی زۆر مەترسی بووەتەوە، بە بەردەوامی پێشێلکاری بەرامبەریان دەکرێت، چونکە زۆرێک لەو خێزانانەی هەوڵی گەڕانەوەیان داوە تووشی دەستگیر کردن و فشار بوونەتەوە، جگە لەوەش مانگانە دەیان پێشێلکاری بەڵگەدار دەکرێن بەتایبەتی بەرامبەر بە ژن و منداڵان کە  لاوازترین گرووپن، "پێشێلکارییە بەردەوامەکان تەنانەت دوای ڕووخانی دەسەڵاتى بەشار ئەسەدیش".

 

 -بەرپرسیارێتی دەستەبەرکردنی گەڕانەوەی سەلامەتی لە ئەستۆی حکومەتی ڕاگوزەریی ئێستادایە، لەڕێگەی دامەزراندنی بڕگەی یاسایی ڕوون کە مافی گەڕاوەکان دەستەبەر دەکات، لەوانە دوورخستنەوەی ئەو گرووپە چەکدارەکانە، پێکهێنانی هێزی ئاسایشی ناوخۆ لە خەڵکی ناوچەکە و چاودێریکردنی نەتەوەیەکگرتووەکان بۆ پرۆسەی گەڕانەوە.