باندێکی دراوی ساختە لە سلێمانی دەستگیر دەكرێن

ئاڤا نیوز

 

هێزەکانی بەرێوەبەرایەتیی ئاسایشی سلێمانی، دوای چاودێری و بەدواداچوون، باندێکی چوار کەسییان دەستبەسەر كرد كە خەریكی ساغکردنەوەی دراوی ساختە بوون.

 

چیرۆكی سەرەکی: هێزەکانی دەزگەی ئاسایشی هەرێم، بە فەرمانی دادوەری لێکۆڵینەوەی ئاسایش، لە چەند هەڵمەتێک توانییان سەرجەم ئەندامانی باندەکە دەستگیر بکەن کە لە مانگی ڕەمەزاندا دۆلاری ئەمریکیی ساختەیان بە دووکاندار و فرۆشیاران داوە.

 

ڕاگەیێنراوی فەرمی: "دوای دەستگیرکردنی تەواوی ئەندامانی باندەکە كە تەمەنیان لە نێوان 24 بۆ 30 ساڵ و دانیشتووی شاری سلێمانی و قەزای چەمچەماڵن، سەرجەم دراوە تەزویرەکانیشیان دەستی بەسەردا گیراوە بۆ ئەوەی لەنێو ببرێت".

 

هۆكارە زانراوەكان: لە دوای گەمارۆكانی ئەمریكا لەسەر ئێران، عێراق بووە شوێنی ساغكردنەوەی دراوی ساختە و هەناردەكردنی پارە بەتایبەت دۆلاری ئەمریكی بۆ ئێران؛ هەر ئەمەش هۆكار بوو بۆ ئەوەی چەندین بانك و كەسایەتی بخرێنە نێو لیستی گەمارۆكانی گەنجینەی ئەو وڵاتە، هەرێمی كوردستانیش لەم كارە نایاساییانە بێبەری نەبووە، بۆیە لە ماوەی ڕابردوو چەندین باندی هاوشێوە دەستبەسەر كراون.