وەزارەتی ناوخۆ لە جۆرێک سزای سەر ئۆتۆمبێل خۆش دەبێت

ئاڤا نیوز

وەزارەتی ناوخۆ نووسراوی ئاراستەی بەڕێوەبەرایەتیی گشتیی هاتووچۆ كردووە، داوا دەكات لێبوردن بۆ سەرجەم ئەو كەسانە بكرێـت ئۆتۆمبێلەكانیان 60 ڕۆژی بەسەر تێپەڕیوە و ژمارەیان نەكردووە.

چیرۆکی سەرەکی: وەزارەتی ناوخۆ لێخۆشبوون بۆ سزای ئەو ئۆتۆمبێلانە دەکات كە ژمارە كاتین و دوو مانگ بەسەر کڕینیان تێپەڕێوە و تا ئێستا ژمارەیان نەکردووە، لێخۆشبوونەکەش تاوەکوو 31ـی ئەم مانگەیە.

ئەوەی پێویستە بیزانیت: کاتێک هاووڵاتی لە کۆمپانیا ئۆتۆمبێلی ژمارە کاتی دەكڕێت، دوای ئەوەی گرێبەستی ئەلیكترۆنی دەكات دەبێت تا دوو مانگ بەناوی بكات و ژمارەی بكات، ئەگەر لەو دوو مانگە ژمارەی نەکات دوای دوو مانگەكە بۆ هەر ڕۆژێك 10 هەزار دینار سزا دەدرێت.

شێوازی جێبەجێکردن: بڕیاری لێخۆشبوونەكە تاوەكوو 31ـی ئەم مانگەیە، تا ئەو كاتە لە سزای دواکەوتن دەبەخشرێن، داوا لە خاوەن ئۆتۆمبێلەكان دەكرێت دەست بە مامەڵە بكەن و لە سبەی پێنجشەممەوە بڕیارەكە جێبەجێ دەكرێت.