ئەنجوومەنی پیرانی ئەمریکا پڕۆژەیاسای بەرگریی وڵاتەکەی پەسەند کرد

ئاڤا نیوز

ئەنجوومەنی پیرانی ئەمریکا پڕۆژەیاسای بەرگریی نیشتمانیی بە بڕی 901 ملیار دۆلار پەسەند کرد و ڕەوانەی نووسینگەی دۆناڵد ترەمپ، سەرۆکی ئەمریکای کرد بۆ ئەوەی واژۆی بکات.

چیرۆکی سەرەکی: ئەمڕۆ چوارشەممە پڕۆژەیاسای بەرگری نیشتمانی بە پشتیوانیی بەهێزی هەردوو حیزبی کۆماری و دیموکراتەکان، لە ئەنجوومەنی پیرانی ئەمریکا تێپەڕێندرا.

زانیاریی بەدەستهاتوو: پڕۆژەیاساکە زیاتر لە سێ هەزار لاپەڕەیە، کارە لەپێشینەکانی بەرگریی ئەمریکا دیاری دەکات و چەندین خاڵی گرنگی تێدایە:

٠ بەڕێژەی 3.8% مووچەی سەرجەم سەربازانی ئەمریکا زیاد دەکرێت.

٠ بەشێک لە فەرمانەکانی دۆناڵد ترەمپ، دەچەسپێنێت، وەک قەدەغەکردنی پڕۆگرامەکانی فرەیی و یەکسانی لە وەزارەتی جەنگی ئەمریکا، ڕێگەدان بە بەکارهێنانی سوپا لە سنووری مەکسیک بۆ ڕێگریکردن لە کۆچبەران و جێگیرکردنی قەڵغانی مووشەکیی گۆڵدن دۆم بۆ پاراستنی ئەمریکا.

٠ بەپێی دەقێکی ناو یاساکە، ژنانی ڕەگەزگۆڕاو لە بەشداریکردن لە چالاکییە وەرزشییەکان لە ئەکادیمیا سەربازییەکانی ئەمریکا بێبەش دەکرێن.

کاریگەریی لەسەر عێراق، سوریا و ئۆکرانیا

یەکێک لە خاڵە هەرە گرنگەکان بۆ ڕۆژهەڵاتی ناوەڕاست بریتییە لە:

٠ هەڵوەشاندنەوەی ئەو پاساوە یاساییانەی کە بۆ هێرشکردنە سەر عێراق لە ساڵانی 1991 و 2003 بەکارهێنرابوون.

٠ لابردنی سزاکانی سەر سووریا کە بەپێی یاسای پاراستنی مەدەنیی قەیسەری ساڵی 2019 سەپێنرابوون.

٠ تەرخانکردنی 400 ملیۆن دۆلار وەک هاوکاری سەربازی بۆ ئۆکرانیا بۆ ساڵانی 2026 و 2027.