ئەمشەو بۆ سووننەکان یەکلاکەرەوەیە؛ حەلبووسی یان سامەڕائی دەبنە کاندید بۆ سەرۆکی پەرلەمان؟

ئاڤا نیوز

ئەنجوومەنی سیاسیی نیشتمانیی سوننە، کە لایەنە براوەکانی هەڵبژاردن لەخۆدەگرێت، ئێوارەی ئەمڕۆ پێنجشەممە، کۆبوونەوەیەکی گرنگ و یەکلاکەرەوەیان دەبێت بۆ ڕاگەیاندنی ناوی کاندیدی سەرۆکی پەرلەمانی عێراق.

 

وێنە گەورەکە: لەگەڵ دیاریکردنی 29ـی 12 بۆ یەکەم دانیشتنی خولی نوێی پەرلەمانی عێراق، هێشتا هێزە سیاسییە سوننییەکان نەیانتوانیوە لەسەر کاندیدێکی هاوبەش بۆ پۆستی سەرۆکی پەرلەمان ڕێکبکەون. سەرەڕای پێکهێنانی "ئەنجوومەنی سیاسیی نیشتمانی" بۆ یەکخستنی ماڵی سوننە هاوشێوەی چوارچێوەی هەماهەنگیی شیعە، بەڵام ناکۆکییەکان لەسەر ناوەکان بەردەوامن.

 

لێدوانی فەرمی: محەممەد دەحام، سەرکردە لە هاوپەیمانیی "عەزم"، بە میدیای عێراقی ڕاگەیاند، "لایەنە سوننەکان ئەمڕۆ ئێوارە لە ماڵی سابت عەباسی، سەرۆکی هاوپەیمانیی حەسم کۆ دەبنەوە بۆ گەیشتن بە ڕێککەوتنی کۆتایی لەسەر میکانیزمی کاندیدکردنی سەرۆکی پەرلەمان."

 

ئەوەی ئێستا ڕوودەدات: دەحام ڕوونی کردەوە، "ڕێککەوتنەکە لەسەر ئەوە دەبێت کە بە ناوی دوو کەسایەتیی کاندیدکراو لەلایەن ئەنجوومەنی سیاسیی نیشتمانییەوە (محەممەد حەلبووسی یان موسەننا سامەڕائی) بڕۆن، ئەمە بە فەرمی لە کۆبوونەوەی ئەمڕۆدا ڕادەگەیێنرێت."

 

ئەوەی پێویستە بیزانیت: ئەم هەنگاوە هاوکاتە لەگەڵ جموجۆڵی خێرای سیاسیی لەنێو لایەنە سوننەکان بۆ ڕاگەیاندنی کاندیدی سەرۆکی ئەنجوومەنی نوێنەران. هەروەها، لەتیف ڕەشید، سەرۆککۆماری عێراق ڕۆژی 29ی کانوونی یەکەمی ئەمساڵی وەک وادەی یەکەم دانیشتنی خولی نوێی پەرلەمانی عێراق دیاریکردووە.