پارتی دوو شاند بۆ گفتوگۆی پێکهێنانی حکومەت پێکدەهێنێت

ئاڤا نیوز

جگە لەو شاندەی كە بۆ گفتوگۆكانی پێكهێنانی كابینەی دەی حكومەتی هەرێمی كوردستان پێكهێنراوە، پارتی بۆ پێکهێنانی کابینەی نوێی حکومەتی عێراقیش  شاندێک بۆ گفتوگۆکردن لەگەڵ لایەنە عێراقییەکان پێکدەهێنێت.

چیرۆکی سەرەکی: لە کۆتا کۆبوونەوەی کۆمیتەی ناوەندیی پارتی بە سەرپەرشتیی سەرۆک بارزانی، بڕیار درا شاندێکی شەش کەسی بە سەرۆکایەتیی فازڵ میرانی، بەرپرسی دەستەی کارگێڕیی مەکتەبی سیاسی، بۆ گفتوگۆکردن لەگەڵ لایەنە عێراقییەکان پێکبهێنرێت.

زانیاریی تایبەت:  سەرچاوەیەک بە ئاڤا میدیای ڕاگەیاند؛ ئەندامانی شاندەکە بریتین لە: فازڵ میرانی، د. فوئاد حوسێن، نەوزاد هادی، د. ئومێد سەباح و فارس عیسا.

- دەربارەی پۆستی سەرۆککۆماری عێراق، پارتی پێی وایە ئەم پۆستە پشکی کوردە و پێویستە هەموو لایەنەکان لەسەر کاندیدێکی نیشتمانی ڕێک بکەون؛ چونکە ئەو پۆستە بە موڵکی هیچ لایەنێکی دیاریکراو دانانرێت.

- سەبارەت بە پێکهێنانی کابینەی دەیەمی حکومەتی هەرێمی کوردستان؛ پارتی دووپاتی دەکاتەوە کە پشکی لایەنەکان بەگوێرەی ئیستیحقاقی هەڵبژاردن دەبێت و گفتوگۆکان لەگەڵ لایەنە ناوخۆییەکان بەردەوام دەبن.