لە بەنزینخانەکان تۆنێک غاز 95 هەزار دیناری چووتە سەر

ئاڤا نیوز

 

ماوەی هەفتەیەکە غازی LPG لە بەنزیخانەکان گران بووە. بەگوێرەی بەدواداچوونی ئاڤا هۆکاری گرانبوونەکەی پەیوەندی بە خواستی زۆری غاز هەیە لەلایەن شۆفێرانەوە.

 

وێنە گەورەکە: بەشێک لە شۆفێران لە هەرێمی کوردستان سیستمی سوتەمەنی ئۆتۆمبێلەکانیان لە بەنزینەوە بۆ غاز گۆڕیوە، ئەمەش بووەتە هۆی بەرزبوونەوەی خواست لەسەر غاز لە بەنزینخانەکان.

 

لێدوانی فەرمی: جەنگی مەجید، سەرۆکی لیژنەی دابەشکردنی سووتەمەنی لە پارێزگای هەولێر بە ئاڤا میدیای ڕاگەیاند، ماوەی هەفتەیەکە هەر تۆنێک غاز 95 هەزار دیناری چووەتەسەر، واتا لە 600 هەزار دینارەوە بووەتە 695 هەزار دینار. بەمەش لە بەنزیخانەکان هەر لیترێکی غاز لە 380 دینارەوە بۆ 450 دینار بەرز بووەتەوە.

 

- سەرۆکی لیژنەی دابەشکردنی سووتەمەنی لە پارێزگای هەولێر، دڵنیایی دا کە بەرزبوونەوەی نرخ کاریگەری بۆ سەر غازی ماڵان نەبووە و بوتڵێکی بە هەشت هەزار و 500 دینارە.

 

هۆکارە زانراوەکان: جەنگی مەجید دەڵێت: هۆکاری بەرزبوونەوەی نرخی غاز بۆ زۆربوونی خواست دەگەڕێتەوە. ئەمساڵ نرخەکەی بەو ئاستە قورسە بەرز نەبووەتەوە، لە کاتێکدا ساڵی پار هەر لیترێک غاز بووبە 700 دینار و تۆنی بوو بە هەزار دۆلار.

 

لەلایەکی دیکە: سەبارەت بە دابەشکردنی نەوت، سەرۆکی لیژنەی دابەشکردنی سووتەمەنی دەڵێت، بە نزیکی دابەشکردنی نەوت لە دەورووبەری هەولێر کۆتایی هاتووە و چاوەڕوانی وەزارەتی سامانە سروشتییەکانین نووسراوی دابەشکردن بکات و لە سەنتەری شاری هەولێر دەست بە دابەشکردنی نەوت بکرێت.