سەرۆکوەزیران مەسرور بارزانی و عەبدولفەتاح سیسی کۆبوونەوە

ئاڤا نیوز

 

سەرۆکوەزیران مەسرور بارزانی و عەبدولفەتاح سیسی سەرۆکی میسر کۆبوونەوە و هەردوولا جەختیان لە زیاتر پتەوکردنی پەیوەندییەکانی نێوانیان کردەوە، ڕاشیانگەیاند، پشتیوانیی ئاسایش و سەقامگیریی ناوچەکە دەکەن، پەرەی زیاتریش بە پەیوەندییە ئابوورییەکانی نێوانیان دەدەن.

 

چیرۆکی سەرەکی: ئێوارەی ڕۆژی شەممە 20-12-2025، سەرۆکوەزیران مەسرور بارزانی، بە سەردانێکی فەرمی گەیشتە قاهیرەی پایتەختی میسر و لەلایەن ئەحمەد فوئاد هنو، وەزیری ڕۆشنبیریی و ژمارەیەک لە بەرپرسانی دیکەی میسری پێشوازی لێکرا.

 

ڕاگەیێنراوی فەرمی؛ ماڵپەڕی حکومەتی هەرێمی کوردستان بڵاوی کردەوە، سەرۆکی میسر خۆشحاڵی خۆی بە سەردانی سەرۆکوەزیرانی هەرێمی کوردستان نیشان دا، ئامادەیی وڵاتەکەی بۆ پەرەپێدانی پەیوەندیی دوو لایەنە دووپات کردەوە.

 

لەلایەکی دیکە: سەرۆکایەتیی کۆماری میسر بڵاوی کردەوە، ئەمڕۆ یەکشەممە عەبدولفەتاح سیسی، سەرۆکی میسر پێشوازی لە سەرۆکوەزیران مەسرور بارزانی و شاندی یاوەری کرد، لە کۆبوونەوەکەشدا پشتیوانیی تەواوەتی قاهیرە بۆ ئاسایش و ئارامیی عێراق دووپات کرایەوە و ستایشی پەیوەندییە ئەمنییەکانی نێوان هەردوو وڵات و ڕۆڵی هەرێمی کوردستانیش لە ئاشتی ناوچەکەدا کرا

 

بەشێکی دیکە لە ڕاگەیێنراوی کۆبوونەوەکە:

 

-سەرۆکوەزیرانی کوردستان پێزانینی هەبوو بۆ ڕۆڵی سەرۆک سیسی و میسر لە پشتیوانیی عێراق و جەختی کردەوە لەوەی حکومەتی کوردستان خواستی بەهێزکردنی پەیوەندییەکانی لەگەڵ قاهیرە هەیە.

 

-لە کۆبوونەوەکەدا هەماهەنگیی ئابووری نێوان میسر لەگەڵ عێراق و کوردستان تاوتوێ کرا، سەرۆک سیسی جەختی لە زیاتر بەهێزکردنی ئەو پەیوەندییانە کردەوە بەتایبەت ئەزموونی کۆمپانیاکانی میسر لە بوارەکانی وزە و ژێرخان لە ناوخۆ و دەرەوە کە دەکرێت سوودیان لێوەربگیرێت، داواشی لە مەسرور بارزانی کرد لەم بوارەدا سوود لە ئەزموونی کۆمپانیاکانی میسر وەربگیرێت.

 

-سەرۆکوەزیران مەسرور بارزانی پێشوازی لە هاتنی کۆمپانیاکانی میسر بۆ عێراق کرد و ئاشکرای کرد کە لەم سەردانەیدا لەگەڵ ئەو لایەنانەی میسر کۆ دەبێتەوە کە لەو بوارانەدا کاردەکەن، کە بەلای حکومەتی کوردستانەوە بواری خزمەتگوزاریی لەپێشینەن.

 

-لە کۆبوونەوەکەدا پرسە هەرێمییەکانیش باسکران و سەرۆکی میسر باسی لە ڕوانگەی وڵاتەکەی بۆ ئارامی ناوچەکە کرد، گوێشی لە بۆچوونی سەرۆکوەزیران مەسرور بارزانی لەم بوارەدا گرت.