وەزارەتی تەندروستیی عێراق: نموونەی خوێن لە خێزانی ئێزدییەکان وەردەگیرێت

ئاڤا نیوز

 

وەزارەتی تەندروستیی عێراق ڕایگەیاند، دەست بە هەڵمەتێکی گشتگیر دەکەن بۆ وەرگرتنی نموونەی خوێن لە کەسوکاری قوربانیانی پێکهاتەی ئێزدی لە پارێزگای نەینەوا، کە ئامانج لێی دۆزینەوە و دەستنیشانکردنی ناسنامەی ئەو کەسانەیە لەلایەن داعشەوە بێسەروشوێن کراون.

 

لێدوان فەرمی: سەیف بەدر، وتەبێژی فەرمیی وەزارەتی تەندروستیی عێراق ڕایگەیاند، "ئەم هەڵمەتە بە هەماهەنگی لەگەڵ دامەزراوەی شەهیدان و لیژنەی نێودەوڵەتیی کاروباری بێسەروشوێنان (ICMP) جێبەجێ دەکرێت. نموونەی خوێن و زانیاریی ناسنامەیی لە خێزانەکانی قوربانیانی ئێزیدی لە نەینەوا وەرگیراوە، ئەوانەی کە منداڵەکانیان لەلایەن داعشەوە بێسەروشوێن کراون."

 

دەشڵێت: پرۆگرامێکی هاوبەشمان لەگەڵ نێردەکانی لیژنەی نێودەوڵەتیی خاچی سووری عێراق و سوودان ڕێکخستووە، پرۆگرامەکە پڕۆسەکانی گەڕاندنەوەی پاشماوەکان، شیکارکردن و دەستنیشانکردنی ناسنامەیان، ڕادەستکردنەوە و ناشتنیان بەپێی ستانداردە پەسەندکراوەکان لەخۆدەگرێت.

 

باکگراوند: لە ساڵی 2014، کاتێک ڕێکخراوی داعش هێرشی کردە سەر ناوچە ئێزدینشینەکان هەزاران کەسی لێ کوشتن و هەزارانی دیکەشی ڕفاند و بێسەروشوێن کرد.