ئەردۆغان: جەهەپە هیچ بەرنامەیەکی بۆ سەرخستنی پرۆسەی ئاشتی نییە

ئاڤا نیوز

سەرۆککۆماری تورکیا ئاماژە بەوە دەدات لە کاتێکدا ئەوان بە دڵ و بە گیان هەوڵی سەرخستنی پرۆسەی ئاشتی دەدەن، کەچی جەهەپە پاشگەز بووەتەوە لە قسەکانی و جددی نییە بۆ سەرخستنی پرۆسەکە.

چیرۆکی سەرەکی: سەرۆکی جەهەپە وەک گەورەترین پارتی ئۆپۆزسیۆن لە تورکیا چەندینجار پشتیوانی پارتەکەی بۆ سەرخستنی پرۆسەی ئاشتی نیشان داوە، کەچی لەو ڕاپۆرتەدا کە جەهەپە پێشکەشی پەرلەمانی تورکیای کردووە هیچ ئاماژەیەکی ڕوونی نەداوە بەو پرۆسەیە و پرسی کورد.

لێدوانی فەرمی: ڕەجەب تەیب ئەردۆغان، سەرۆککۆماری تورکیا و سەرۆکی ئاکپارتی ڕایگەیاند ئەوان و مەهەپەی هاوپەیمانییان وەک هاوپەیمانی جومهور لە ڕۆژی یەکەمەوە هەوڵەکانیان چڕ کردوونەتەوە بۆ سەرخستنی پرۆسەی ئاشتی.

ئەردۆغان باس لەوە دەکات ئەوان لە پێناو کۆتاییهێنان بە شەڕ و شۆڕ، هەوڵەکانیان چڕ کردووەتەوە و پرۆسەی ئاشتی ناکەنە قوربانی دەسکەوتی سیاسی و دەڵێت: دڵنیام کۆمیسیۆنە پەرلەمانییەکە دوایین قۆناغی پرۆسەکە دەگەیەنێتە ئەنجام.

ئەردۆغان جەهەپە بەوە تۆمەتبار دەکات کە هیچ جیدییەتێکی نیشان نەداوە بۆ سەرخستنی پرۆسەکە و دەڵێت: جەهەپە هیچ ئیرادەیەکی نییە بۆ ئەوە و ئەمە لە ڕاپۆرتەکەشیدا ڕەنگی داوەتەوە و لە قسەکانی پاشگەز بووەتەوە.