وەزارەتی کارەبا کەمبوونەوەی هەزار مێگاواتی ڕاگەیاند

کوردستان
2 کاتژمێر لەمەوپێش

شەیری بکە لە:

وەزارەتی کارەبا کەمبوونەوەی هەزار مێگاواتی ڕاگەیاند

دیمەنی گەڕەکێکی هەولێر و لۆگۆی وەزارەتی کارەبا

ئاڤا نیوز

وەزارەتی کارەبای کوردستان دەڵێت، بەهۆی گرفتێکی تەکینکی 1000 مێگاوات کارەبا کەمی کردووە، بەمەش کاتژمێرەکانی پێدانی کارەبا بە هاوبەشان کەم بووەتەوە

وێنە گەورەکە: کۆمپرێسەرەکانی ناردنی غاز لە کێڵگەی غازی کۆرمۆر بۆ وێستگەكانی كارەبا کێشەی تێکەوتووە بەمەش ناردنی غاز بۆ وێستگەکان کەمی کردووە، بەوهۆیەوە پێدانی کارەبای نیشتمانی لە هەرێمی کوردستان کەمبوونەتەوە. لە ڕۆژی چوارشەممەوە لە هەندێک گەڕەکی هەولێر سێ بۆ 12 کاتژمێر کارەبا نەبووە.

ڕاگەیێنراوی فەرمیی: وەزارەتی کارەبا لە ڕاگەیێنراوێکدا ئاگاداری هاوبەشانی کارەبا دەکاتەوە: بەهۆی گرفتێکی تەکنیکییەوە لە کێڵگەی کۆڕمۆڕ بڕی 250 ملیۆن پێ سێجا گاز کەمی کردووە و بووەتە هۆی کەمبوونەوەی بڕی 1000 مێگاوات کارەبا.

زانیاریی زیاتر: هەردوو وەزارەتی کارەبا و وەزارەتی سامانە سرووشتییەکان لەگەڵ تیمەکانی داناگاز لە هەوڵدان بۆ چارەسەرکردنی گرفتەکە و ئاساییکردنەوەی بارودۆخەکە.

کاریگەری و لێکەوتەکان: بەگشتیی ڕۆژانە شەش کاتژمێر کارەبا لەسەر ئاستی هەرێمی کوردستان کەم دەبێتەوە، بەڵام کاریگەرییەکەی لە شار و ناوچەیەکەیەوە بۆ شار و ناوچەیەکی دیکە جیاوازە، لە هەندێک شوێن بۆ نموونە لە چەند گەڕەکێکی هەولێر ڕۆژانە 12 کاتژمێر کارەبا نییە.

باکگراوند: دوێنێ ئاڤا بەدواداچوونی بۆ گرفتەکە کرد و بەڕێوەبەری گشتیی كارەبای هەولێر ڕاگەیاند، بەهۆی كێشەی تەكنیكی، غازی دابینكراو بۆ وێستگەكانی كارەبای هەولێر و چەند شوێنێكی دیكەی شار و شارۆچكەكانی هەرێمی كوردستان بە بڕی نزیكەی 600 مێگاوات كورتهێنانی هەبووە، ئەمڕۆش لە ڕاگەیێنراوێکدا وەزارەتی کارەبا بڵاوی کردەوە بڕی 1000 مێگاوات کارەبا کەم دەبێتەوە.