قایمقامی سیدەکان دەنگۆی بێسەروشوێن بوونی چەند هاونیشتمانییەک ڕەت دەکاتەوە

ئاڤا نیوز

 

قایمقامی سیدەکان دووپاتی دەکاتەوە، هیچ کەسێک لە سنووری قەزای سیدەکان بێسەروشوێن نەبووە، ئەو کەسانەشی لە "کێلەشین و بێرکم"ن پەیوەندیمان پێیانەوە کردووە و دەگەڕێنەوە.

 

چیرۆکی سەرەکی: ئەمڕۆ یەکشەممە 28-12-2025، لە هەندێ میدیا و ئەکاونتی سۆشیاڵ میدیا دەنگۆی ئەوە بڵاو کرایەوە حەوت کەس لە "بێرکم" گیریان خواردووە، هەشت کەسیش لە کوێستانی "کێلەشین" بێسەروشێن بوون.

 

لێدوانی فەرمی: ئیحسان چەلەبی، قایمقامی سیدەکان بە ئاڤا میدیای گوت: هیچ کەس لەم سنوورە بێسەروشوێن نەبووە، ئەو کەسانەشی لە کێلەشین و بێرکمن پەیوەندیمان پێیانەوە کردووە و دەگەڕێنەوە.

 

- ئەو هەشتە کەسەی لە کێلەشینن ئاژەڵدارن، لە بەیانییەوە پەیوەندیمان پێیانەوە کرد بگەڕێنەوە و دەستیان بە گەڕانەوە کردووە، بەڵام بەهۆی ئاژەڵەکانیانەوە هێواش دێنەوە، داوای ترکتۆرێکیان کردبوو بۆ ئەوەی ڕێگایان بۆ بکاتەوە، تراکتۆریشمان بۆ ڕەوانە کردوون، هەندێ لە خزم و کەسیشیان چوون بۆ ئەوەی هاوکارییان بکەن.

 

- ئەو حەوت کەسەی لە گوندی بێرکم ماونەتەوە شاخەوان نین، بەڵکو بۆ سەیران شەوی ڕابردوو چوونەتە ئەو شوێنە، خێمە و ئۆتۆمبێل و پێداویستییان لەلایە و گیریان نەخواردووە، پەیوەندیمان بە ئەوانیشەوە کردووە بۆ ئەوەی بگەڕێنەوە، ئەوانیش بەهەمان شێوە دەگەڕێنەوە.

 

-  لەگەڵ هەردوو گرووپ لە پەیوەندیی بەردەوامین، هەر کات پێویست بکات ئێمە تیمیان بۆ ڕەوانە دەکەین و بەهانایانەوە دەچین.