ئومێد خۆشناو: سێ خاڵی لاوازمان لە هەولێر هەیە و چارەسەری دەکەین

ئاڤا نیوز

 

ئومێد خۆشناو، پارێزگاری هەولێر ڕایدەگەیێنێت، بە پلانەکانیان ڕێگریان لە دروستبوونی لافاو کردووە و سێ خاڵی لاوازیشیان لە شارەکە هەیە.

 

لێدوانی فەرمی: ئومێد خۆشناو، پارێزگاری هەولێر ڕایگەیاند، دوای لافاوەکەی ساڵی 2021ـی هەولێر، ئێمە بە دوای هۆکارەکاندا گەڕاین و کۆنفرانسێکمان بەست، ئەوکات نەخشە ڕێگایەک بۆ ڕووبەڕوبوونەوەی باردۆخەکە پەسەند کرا. هەروەها لە بابەتە ستراتیژییەکان کاری زۆر گەورە کراوە، تەواوکردنی بەنداوەکان و دروستکردنی پۆندەکان بەشێکە لەو پڕۆسەیە و مەترسییەکانی لافاو لەسەر هەولێر کەم دەکەنەوە. 

 

- دروستکردنەوەی کەند و ڕێڕەوەکان، بە یەکتربەستنەوەیان بە مەودای 700 کیلۆمەتر، کاریگەریی ئەرێنی هەبووە، هەروەها چاککردنەوەی بەشێک لەو ڕێڕەوانەی بەهۆی شارەکانی نیشتەجێبوونەوە دروست بوون، مەترسییەکان لافاو کەم کرایەوە.

 

ئەوەی پێویستە بیزانیت: لەبارەی خاڵە لاوازەکانی شاری هەولێر، ئومێد خۆشناو دەڵێت: لەگەڵ دەیان خاڵی لاواز کە هەمانبووە و چارەسەر کراون، ئێستا تەنیا سێ خاڵی لاوازمان لە هەولێر هەیە، کە ئەمانەن: 

-شەقامی 100 مەتری لە لای فاملی مۆڵەوە تا دەگاتە ڕێگەی شەقڵاوە.
-لەوەتەی هەولێر هەیە، لە نزیک یاریگای شەهید فەرەنسۆ هەریری کێشە ئاو و ئاوەڕۆی هەیە.
-گەورەترین خاڵی لاوازی سەنتەری هەولێر لە کەمالیاتەکان و گەڕەکی گڵکەندەوە دەستپێدەکات تا دەگاتە بازاڕی نیشتمان و داون تاون، بەهۆی دروستکردنی ئەو دوو بازاڕە ئاوەڕۆ و مەنهۆلەکان تێکچوون، مەنهۆلە جێگرەوەکانیش بەرگەی ئەو ئاوە زۆرە ناگرن.