نەتانیاهۆ و ترەمپ کۆدەبنەوە؛ پرسی غەززە و سووریا و ئێران لەسەر مێزن

ئاڤا نیوز

 

بڕیارە بنیامین نەتانیاهۆ، سەرۆكوەزیرانی ئیسرائیل بە سەردانێكی دیپلۆماسی بەرەو ئەمریكا بچێت، ڕۆژی دووشەممە 28-12-2025 لەگەڵ دۆناڵد ترەمپ، سەرۆكی ئەمریكا كۆببێتەوە، چاوەڕێ دەكرێت چارەنوسی غەززە و چۆنێتی کشانەوەی سوپای ئیسرائیل بەلادا بخرێت.

 

چیرۆكی سەرەكی: لە ساڵی 2025دا دۆناڵد ترەمپ، پێنج كۆبوونەوەی لەگەڵ بنیامین نەتانیاهۆ ساز كردووە، لەبەرئەوەی شانازی بەوە دەكات جەنگی غەززەی ڕاگرتووە و پلانێكی ستراتیژیی داڕشتووە بۆ ئاسایی كردنەوەی دۆخی غەززە، لە قۆناغی یەكەمدا جەنگ وەستێنرا و هاوكارییە مرۆییەكان ڕەوانە كران و دیل و تەرمەكان ئاڵوگۆڕ كران، لە قۆناغی دووەمدا كار بۆ چەكداماڵینی حەماس و كشانەوەی سوپای ئیسرائیل لە غەززە دەكرێت.

 

لێدوانی فەرمی: دۆناڵد ترەمپ، سەرۆكی ئەمریكا دەڵیت: ''ئەو (نەتانیاهۆ) دەیەوێت من ببینێت، ئێمە سەركەوتنێكی گەورەمان بۆ ڕۆژهەڵاتی ناوەڕاست بەدەستهێنا و ئێستا ئاشتی لە ڕۆژهەڵاتی ناوەڕاست هەیە، ئەگەر هەیە ئەو بێت بۆ فلۆریدا و لەوێ من ببینم''.

 

ئەجێندای كۆبوونەوەكە: لەناو پرسە گرنگی كۆبوونەوەی لوتكەكە، هەردوولا پرسی غەززە و ئێران و سووریا تاوتوێی دەكەن، بەم شێوەیە:

 

-غەززە، هەنگاوەكانی قۆناغی دووەمی ڕێككەوتنی غەززە و پرسی چەككداماڵینی حەماس و کشانەوەی سوپای ئیسرائیل، پرسی گەرمی كۆبوونەوەكە دەبن.

 

-ئێران، نەتانیاهۆ هەڵگری دوو پەیامی سەرەكییە، یەكەمیان پێویستی خۆپاراستن لە هەڵكشانی ناكۆكییەكان، دووەمیش سەپاندنی فشاری ئابووریی توندتر بەسەر تاران.

 

-سووریا، داواكارییەكانی ئیسرائیل بریتی دەبن لە دروستكردنی ناوچەیەكی داماڵراو لە چەك لە باشووری سووریا، پاراستنی دروزەكان و ڕێگریكردن لە دیمەشق لە بوونی بە كۆگایەكی چەكی پێشكەوتوو.

 

ئەوەی پێشبینی دەكرێت: هەر چەندە بەرپرسانی ئیسرائیل كۆبوونەوەكە بە چارەنووسساز ناو دەبەن، بەڵام بۆخۆی یەكلاكەرەوە نییە و ئەگەری كۆبوونەوەی دووەمیش لە كۆتایی هەفتەكەدا ماوەتەوە، ئەمەش بەندە بە ئەنجامی یەكەم كۆبوونەوە.

 

ئەمەش بزانە: خاوبوونەوەی پرۆسەی ئاشتی غەززە خواستی نەتانیاهۆیە و هەنگاوەكانی جێبەجێكردنی قۆناغی دووەمی ڕێككەوتنی ئاگربەستەكە مەترسییەكانی بۆ داهاتووی غەززە زیادكردووە، چونكە ترەمپ دەیەوێت رێككەوتنی غەززە خێراتر بچێتە پێشەوە.

 

چاوەڕوانكراو: ترەمپ ئاشكرای كردووە لە مانگی یەكی ساڵی داهاتوو "چەند دەستپێشخەرییەكی گەورە" سەبارەت بە كەرتی غەززە ڕابگەیەنێت، بەڵام ئەمە بە شێوەیەكی سەرەكی پەیوەستە بە كۆبوونەوەكەی لەگەڵ نەتانیاهۆ.