21 وڵاتی ئیسلامی و عەرەبی دانپێدانی ئیسرائیل بە "سۆماڵیلاند" ڕەت دەکەنەوە

ئاڤا نیوز

21 وڵاتی ئیسلامی و عەرەبی و ڕێکخراوی هاوکاریی ئیسلامی، ڕەتکردنەوەی تووندی خۆیان دژی دانپێدانی ئیسرائیل بە ناوچەی "سۆماڵیلاند" وەکو دەوڵەتی سەربەخۆ ڕاگەیاند.

چیرۆکی سەرەکی: ڕۆژی هەینی، ئیسرائیل وەکو یەکەم دەوڵەت دانی بە سەربەخۆیی ناوچەی "سۆماڵیلاند" لە وڵاتی سۆماڵ دانا، ئەمەش ناڕەزایی و ڕەتکردنەوەی وڵاتانی ناوچەکە و جیهانی لەوانەش ئەمریکا بەدوای خۆیدا هێنا.

ڕاگەیێنراوی فەرمی: وەزارەتی دەرەوەی ئوردن ڕاگەیێنراوی هاوبەشی وەزیرانی 21 دەوڵەت و ڕێکخراوی هاوکاریی ئیسلامی بڵاو کردەوە، ئەو وڵاتانە ڕەتکردنەوەی تووندی خۆیان دژی دانپێدانانی ئیسرائیل بە ناوچەی "سۆماڵیلاند" ڕاگەیاندووە و بە مەترسی بۆ سەر ئاشتی و ئاسایش لە ناوچەی قۆچی ئەفریقیا و دەریای سووریان دانا، هاوکات جەخت لەوە دەکەنەوە ئەو هەنگاوە "پێشێلکارییەکی ئاشکرای یاسا نێودەوڵەتییەکان و  نەتەوە یەکگرتووەکان دەکات، کە جەخت لەسەر پاراستنی سەروەری و یەکگرتوویی و یەکپارچەیی خاکی دەوڵەتان دەکاتەوە."

زانیاریی زیاتر: 21 وڵاتەکە ئەمانەن؛ سۆماڵ، عێراق، تورکیا، ئێران، پاکستان، میسر، جەزائیر، قەتەر، سعوودیە، نێجیریا، فەلەستین، سوودان، یەمەن، جیبۆتی، گامبیا، لیبیا، ماڵدیڤ، عومان، ئوردن، کوێت، دوورگەکانی قەمەر و ڕێکخراوی هاوکاریی ئیسلامی.