سوننەکان ئەمشەو کۆبوونەوەی دووەم بۆ یەکلاییکردنەوەی کاندیدی سەرۆکی پەرلەمان دەکەن

ئاڤا نیوز

ئەنجوومەنی سیاسیی نیشتمانی کە هێزە سوننەکانی براوەی هەڵبژاردن لەخۆدەگرێت، ئەمشەو کۆبوونەوەی دووەمی خۆی دەکات بۆ یەکلاییکردنەوەی کاندیدی سەرۆکی پەرلەمان.

ئەوەی پێویستە بیزانیت: کەمتر لە 24 کاتژمێر بۆ یەکەم کۆبوونەوەی خولی نوێی پەرلەمانی عێراق ماوە، ئەگەر هاتوو و سوننەکان لەسەر کاندیدێک نەگەیشتنە ڕێککەوتن، ئەوا ڕەنگە لە دانیشتنی سبەی دووشەممە بە جیا کاندیدی خۆیان پێشکەش بکەن، ئەگەر لەمەشدا سەرکەوتوو نەبوون، دانیشتنە تەنیا بۆ سوێند خواردن دەبێت.

زانیاریی بەدەستهاتوو: سەرچاوەیەکی ئاگادار بە ئاڤای ڕاگەیاند، "کۆبوونەوەی یەکەمی هێزە سیاسییە سوننەکانی ناو ئەنجوومەنی سیاسیی نیشتمانی، کە لە ماڵی خەنجەر بەڕێوەچوو، کۆتایی هات."

ئەوەی ئێستا ڕوودەدات: سەرچاوەکە وتیشی، "چاوەڕوان دەکرێت کۆبوونەوەی دووەمی ئەنجوومەنەکە کاتژمێر 10:00ـی ئەمشەو بەڕێوەبچێت بۆ تەواوکردنی گفتوگۆکان و یەکلاییکردنەوەی هەڵبژاردنی سەرۆکی پەرلەمان."

ئەمەش بزانە: پێشتر دەروون مەلا ناجی، پەیامنێری ئاڤا میدیا ڕایگەیاندبوو کە سەرکردەکانی ئەنجوومەنی سیاسیی نیشتمانی کۆبوونەوەکەیان لە ماڵی خەمیس خەنجەر، سەرۆکی هاوپەیمانی "سیادە" کۆتایی پێهێناوە، بەڵام تا ئێستا دیار نییە ئایا کاندیدی سەرۆکی پەرلەمان بۆ خولی شەشەم یەکلایی کراوەتەوە یان نا.