لە سێ دەروازەی سنووری ئاستەنگیی هاتوچۆ دروست بووە و هۆشداری دەدرێت

ئاڤا نیوز

 

دوو ڕۆژە بەفر و بارانبارین لە ناوچەکانی هەرێمی کوردستان دەبارێت، لە دەروازە سنوورییەکانیش داوا لە هاووڵاتیان دەکرێت پابەندی ڕێنماییەکان بن.

 

لێدوانی فەرمی: شاخەوان بەکر، بەڕێوەبەری گومرگی باشماخ بە ئاڤای ڕاگەیاند، لێرە بەفر و باران بە لێزمە دەبارێت، تاوەکوو ئێستا ئاستەنگیی هاتووچۆ دروست نەبووە، داوا لە شۆفێران دەکەین پابەندی ڕێنماییەکانی هاتووچۆ بن، بۆ ئەوەی هیچ ڕووداوێکی نەخوازراو دروست نەبێت.

 

لەلایەکی دیکەوە: بەکر بایز، قایمقامی قەزای پشدەر بە ئاڤا میدیای ڕاگەیاند، ئێستا پچڕ پچڕ بەفر دەبارێت، تیمەکانمان بە بەردەوامیی سەرقاڵی پاککردنەوەی ڕێگاکان، ئەگەر کەشوهەوا نالەبار بێت، ئەوا بەناچاریی ڕاگرتنی هاتووچۆ لە مەرزی کێلێ درێژ دەکەینەوە.

 

بەتەنیشت ئەم بابەتەوە: سیروان حسێن، وتەبێژی دەروازەی سنووری حاجی ئۆمەران، بە ئاڤای ڕاگەیاند، بەفربارین بەردەوامە و ئاستەنگییەکی زۆر دروست بووە، بەڵام هاتووچۆ ڕانەگیراوە، داوا لە هاووڵاتیان دەکەین ڕێگای ئەم ناوچەیە بەکارنەهێنن، پابەندی ڕێنماییەکانی هاتووچۆبن.