هۆشداری دەدرێت؛ ڕێگای هەیبەت سوڵتان بەکارمەهێنن

ئاڤا نیوز

 

بەهۆی داڕمانی تاشەبەرد ڕێگای هەیبەت سوڵتان داخراوە و بەڕێوەبەرایەتیی چاککردن و پاراستنی ڕێگاوبانی کۆیەش داوا لە هاونیشتمانیان دەکات ئەو ڕێگایە بەکارنەهێنن.

 

وێنە گەورەکە: شەپۆلێکی بەفر و بارانبارین هەرێمی کوردستانی گرتووەتەوە، بەشێکی ڕێگاوبانی ناوچە شاخاوییەکان بەهۆی بەفر بارین و داڕمانی تاشەبەرد ئاستەنگیی هاتووچۆیان بۆ دروست بووە، تیمەکانی بەڕێوەبەرایەتییەکانی چاککردن و پاراستنی ڕێگاوبانی شارەکان لە شەوی ڕابردووەوە کار لەسەر پاککردنەوەی ڕێگاوبانەکان دەکەن.

 

لێدوانی فەرمی: ئەندازیار کۆسار حەمەساڵح، بەڕێوەبەری چاککردنەوە و پاراستنی ڕێگاوبانی کۆیە، بە ئاڤای گوت: بە درێژایی 50 مەتر تاشەبەرد هاتووەتە سەر ڕێگای هەیبەت سوڵتان بەهۆیەوە ڕێگاکە داخراوە، داوا لە هاونیشتمانیان دەکەین بەهیچ جۆرێک ئەو ڕێگایە بەکارنەهێنن چونکە بەتەواوەتی داخراوە.

 

چارەسەرییەکان: تیمەکانی چاککردنەوە و پاراستنی رێگاوبانی کۆیە سەرقاڵی پاککردنەوەی ڕێگاکەن، بەڵام بەهۆی ئەوەی بەشێک لە تاشبەردەکان زۆر گەورەن بە شۆفل ڕاناماڵدرێن، دەبێت بە ئامێری "دەقاق" بشکێنرێن، بۆیە پاککردنەوەی ڕێگاکە کاتی زۆری پێویستە.

 

ئەوەی پێویستە بیزانیت: ڕێگای هەیبەت سوڵتان، ڕێگای سەرەکیی نێوان قەزای کۆیە و ئیدارەی سەربەخۆی ڕاپەڕینە، هاونیشمانیان دەتوانن بۆ هاتووچۆکردنیان هەردوو ڕێگای کلکە سماق و سماقوڵی وەک ڕێگای جێگرەوە بەکاربهێنن.