لە فەرمانگەیەکی حکومیی عێراق ڕۆبۆت بۆ ڕاییکردنی مامەڵەی هاووڵاتیان دادەنرێت

ئاڤا نیوز

 

لە بەشێک لە فەرمانگەکانی عێراق و لە هەنگاوی یەکەمدا لە بەڕێوەبەرایەتی پاسپۆرت لە جێگەی مرۆڤ، ڕۆبۆت وەڵامی پرسیاری سەردانیکاران دەداتەوە بۆ رایکردنی مامەڵەی هاوڵاتیان.

 

چیرۆکی سەرەکی: لە بەڕێوەبەرایەتی کاروباری شارستانی، پاسپۆرت و نشینگەی بەغدا، وەک هەنگاوێکی تازە ڕۆبۆت دانراوە، بە ژیریی دەستکرد پرۆگرام کراوە و وەڵامی بەشێک لە پرسیاری سەندایکاران دەداتەوە و ڕێنوێنیان دەکات بۆ تەواوکردنی مامەڵەکانیان. 

 

لێدوانی فەرمی: عەبدولئەمیر شەمەری، وەزیری ناوخۆی عێراق، لە فەرمانگەی پاسپۆرت، قسە لەگەڵ ڕۆبۆتەکە دەکات و پێی دەڵێت، دەمەوێت پاسپۆرتی ئەلیکترۆنی دەربکەم ڕێکارەکان چین؟ ڕۆبۆتەکە، دوای چەند چرکەیەک دەست بە قسەکردن دەکات و پێی دەڵێت، بۆ دەرکردنی پاسپۆرتی ئەلیکترۆنی دەبێت سەرەتا ناو تۆماربکەیت، دواتر بەڵگەنامە داواکراوەکان، ناسنامە و ڕەگەزنامە بۆ بەڕێوەبەرایەتی پاسپۆرتی بهێنە، بەشێوەیەکی گشتی لە 30 خولەک بۆ کاتژمێرێک سەرجەم ڕێکارەکانی تایبەت بە دەرکردنی پاسپۆرت تەواودەبن.

 

ئەمەش بزانە: هاوشێوەی مرۆڤ دیزاینکراوە، توانای جوڵەکردن، هاتووچۆ و ڕووکردنە قسەکەری هەیە، رۆبۆتەکە بە شێوەیەک پرۆگرام کراوە، خۆی بەرەو ڕووی هاوڵاتیان دەچێت و بەخێرهاتنتیان دەکات.