یەکێک لە تۆمەتبارانی جینۆسایدکردنی بارزانییەکان سزای لەسێدارەدانی بۆ دەرچوو

ئاڤا نیوز

دوو تۆمەتباری جینۆسایدکردنی بارزانییەکان لە دادگای باڵای تاوانەکانی عێراق دادگایی کران، یەکێکیان سزای لەسێدارەدانی بۆ دەرچوو، ئەوەی دیکەیان بەهۆی نەبوونی بەڵگەوە ئازاد کرا.

 

چیرۆکی سەرەکی: تیمی پارێزەرانی تاوانی جینۆسایدکردنی بارزانییەکان تاوەکوو ئێستا ناوی 61 تۆمەتبار کە دەستیان هەبووە لە جینۆسایدکردنی بارزانییەکان خستووەتە بەردەم دادگای باڵای تاوانەکانی عێراق و ئەمڕۆ دووانیان دادگایی کران.

 

لێدوانی فەرمی: د. ئەیاد کاکەیی، پارێزەری کەیسی جینۆسایدکردنی بارزانییەکان؛ بە ئاڤای گوت، "تۆمەتبار شاکر تەها غەفوور، کە پلەی لیوا بووە لە (ئەمن)، دەستی هەبووە لە بێسەروشوێنکردن و جینۆسایدکردنی بارزانییەکان، لە بیابانەکانی ئەنبار، فەلوجە ناوچەی سەقلاویە بیابانی شەیحیا، بڕیاری لەسێدارەدانی بۆ دەرچوو."

 

گوتیشی، "سەعدوون سەبری جەمیل، یەکێکی دیکە بوو لەوانەی کە ئەمڕۆ دادگایی کرا، بەهۆی نەبوونی بەڵگەی پێویست، لەلایەن دادوەری دادگای باڵای تاوانەکانی عێراق؛ بڕیاری ئازادکردنی بۆ دەرچوو."

 

باکگراوند: ساڵی 1983 لە شەڕی هەشت ساڵەی  عێراق – ئێراندا، هەشت هەزار پیاوی بارزانی لەلایەن ڕژێمی بەعسەوە  جینۆساید کران، بەشێكیان لە ئۆردوگا زۆرەملێكانی قوشتەپە و بەحركەی هەولێر دەستگیر كران و لە بیابانەكانی عەرعەردا زیندەبەچاڵ كران، لە -05-2011 لە دادگای باڵای تاوانی عێراق بە جینۆساید و تاوانی دژە مرۆڤایەتی ناسێنرا.