ئێران هێزی شاهانەی دەریایی کەنەدای خستە لیستی تیرۆرەوە

ئاڤا نیوز 

  
وەزارەتی دەرەوەی ئێران، هێزی دەریایی شاهانەی کەنەدای وەک "ڕێکخراوێکی تیرۆریستی" ناساند و ڕایگەیاند ئەم بڕیارە وەک وەڵامدانەوە و تۆڵەکردنەوە دێت بەرامبەر بە بڕیارێکی ساڵی 2024ی کەنەدا بۆ بە تیرۆریست ناساندنی سوپای پاسدارانی ئێران.

 

لێدوانی فەرمی: وەزارەتی دەرەوەی ئێران لە بەیاننامەیەکدا ئاماژەی بەوە کردووە "ئێران لە چوارچێوەی پرەنسیپی مامەڵەی هاوشێوە، هێزی دەریایی شاهانەی کەنەدا وەک ڕێکخراوێکی تیرۆریستی دەناسێنێت." 

 

ئەمەش بزانە: بەیاننامەکە ڕوونی نەکردووەتەوە کە ئایا ئەم بڕیارە چ لێکەوتەیەکی کردەیی بۆ هێزە کەنەدییەکان دەبێت و چی کاریگەرییەک بە دوای خۆیدا دێنێت.

 

پێشتر چی ڕووی دا: کەنەدا لە 19ی حوزەیرانی 2024 سوپای پاسدارانی خستە لیستی تیرۆرەوە، کە بەهۆیەوە ئەندامانی سوپای پاسداران بۆیان نییە بچنە ناو خاکی کەنەداوە و هەروەها کەنەدییەکان ناتوانن هیچ جۆرە مامەڵەیەکی بازرگانی یان دارایی لەگەڵ ئەندامانی سوپا یان خودی سوپاکەدا بکەن و هاوکات هەر دارایی و سامانێکی سوپای پاسداران یان ئەندامەکانی لە کەنەدا هەبێت، دەستی بەسەردا دەگیرێت.

 

باکگراوند: کەنەدا لە ساڵی 2012ـەوە پەیوەندییە دیپلۆماسییەکانی لەگەڵ تاران پچڕاندووە و ئێرانی بە "گەورەترین هەڕەشە بۆ سەر ئاشتی جیهانی" وەسف کردووە.