دەرگای خۆپاڵاوتن بۆ پۆستی سەرۆککۆماری عێراق کرایەوە

ئاڤا نیوز

 

سەرۆکی پەرلەمانی عێراق دەرگای خۆکاندیدکردنی بۆ پۆستی سەرۆککۆمار کردەوە و ڕایگەیاند، ماوەی پێشکەشکردنی داواکاریی بۆ پۆستی سەرۆککۆمار سێ ڕۆژە و لیژنەیەکی پەرلەمان داواکاریی کاندیدەکان وەردەگرێت، دواتریش ڕێکارەکانی دیکەی تایبەت بەم پرۆسەیە دەستپێدەکەن.

 

لێدوانی فەرمی: دوای هەڵبژاردنی فەرهاد ئەترووشی وەک جێگری دووەمی سەرۆکی پەرلەمان دەستەی سەرۆکایەتی پەرلەمانی عێراق دەستبەکاربوون، هەیبەت حەلبووسی، سەرۆکی پەرلەمانیش ڕایگەیاند، لە چوارچێوەی پابەندبوون بە ماوە دەستوورییەکان،  لە ئەمڕۆوە دەرگای خۆکاندیدکردن بۆ پۆستی سەرۆککۆماری عێراق بۆ ماوەی سێ ڕۆژ دەکەنەوە و هەرکەسێک خواستی پێشکەشکردنی داواکاریی هەیە، لیژنەیەک لە پەرلەمان ئامادە دەکرێت و داواکارییەکان وەردەگرێت.

 

زانیاریی زیاتر: سەرۆکی پەرلەمانی عێراق داوای لە چوارچێوەی هەماهەنگی کرد داواکاری خۆیان پێشکەش بکەن، یوسف کیلابی پەرلەمانتاری دەوڵەتی یاسا و حەنان فەتلاوی پەرلەمانتاری هاوپەیمانی ئاوەدانکردنەوە و گەشەپێدان، بە فەرمی داواکارییەکیان پێشکەشی سەرۆکی پەرلەمان کرد و ڕایانگەیاند، چوارچێوەی هەماهەنگی وەک گەورەترین فراکسیۆنی پەرلەمان دەناسێنن و بەوەش بەگوێرەی دەستوور، ئەم فراکسیۆنە مافی دیاریکردنی سەرۆکوەزیرانی دەبێت.

 

ئەوەی پێویستە بیزانیت: بەگوێرەی دەستوور و دوای هەڵبژاردنی دەستەی سەرۆکایەتیی پەرلەمان، پێویستە لە ماوەی 30 ڕۆژدا سەرۆککۆماری عێراق بە ئامادەبوونی دوو لەسەر سێی پەرلەمانتاران هەڵبژێردرێت، دواتریش سەرۆککۆمار لە ماوەی 15 ڕۆژدا کاندیدی سەرۆکوەزیران بۆ پێکهێنانی حکومەت ڕادەسپێرێت.