ئامینە زکری: پێویستە پەرلەمان و لایەنەکانی کوردستان بڕیار لەسەر پۆستی سەرۆککۆمار بدەن

ئاڤا نیوز

 

ئەندامێکی شاندی پارتی لە بەغدا دەڵێت، "لە عێراق قۆناغێکی تازە لەگەڵ لایەنە سیاسییەکان دەستپێدەکەین". بۆ پۆستی سەرۆککۆماریش، پێویستە پەرلەمانی کوردستان و لایەنە سیاسییەکانی کوردستان بڕیاری لەسەر بدەن.

 

چیرۆکی سەرەکی: لە گەڕی سێیەمی دەنگدان بۆ پۆستی جێگری دووەمی سەرۆکی پەرلەمانی عێراق هەریەک لە فەرهاد ئەترووشی، کاندیدی پارتی و ڕێبوار کەریم، کاندیدی ڕەوتی هەڵویست بۆ ئەم پۆستە کاندید بوون. دواجار پۆستەکە لە بەرژەوەندی فەرهاد ئەتروشی یەکلایی بوویەوە.

 

لێدوانی فەرمی: ئامینە زکری، ئەندامی شاندی پارتی دیموکراتی کوردستان لە بەغدا ڕایگەیاند، لە عێراق لەگەڵ هەموو لایەنە سیاسییەکان قۆناغێکی تازە دەستپێدەکەین و جەختیش لەسەر بنەمای "هاوسەنگی، سازان، هاوبەشی" دەکەینەوە کە دروشمی بانگەشەی ئێمە بوو بۆ هەڵبژاردنی خولی شەشەمی پەرلەمانی عێراق".

 

ئاماژە بەوەش دەکات، لێکتێگەیشتن و گفتوگۆکردن لەگەڵ هەموو لایەنە سیاسییەکان گرنگە و دەبێتە بەرنامەی کاری پارتی دیموکراتی کوردستان، هەروەها "جەخت لەسەر جێبەجێکردنی دەستوور دەکەینەوە" کە سەرۆک بارزانی هەمیشە پێداگری لەسەر دەکات و دەبێت مافەکانی گەلی کورد لەسەر بنەمای دەستوور دابین بکرێت.

 

لەلایەکی دیکەوە: سەبارەت بە پۆستی سەرۆککۆمار، ئامینە زکری دەڵێت، ئەو پۆستە مافی کوردە و موڵکی هیچ لایەنێکی سیاسی نییە، "بۆیە جەخت لەسەر ئەوە دەکەینەوە، پێویستە فراکسیۆنەکانی پەرلەمانی کوردستان یان لایەنە سیاسییەکانی هەرێمی کوردستان بڕیاری لەسەر بدەن".

 

باکگراوند:  ڕۆژی دووشەممە لە گەڕی یەکەم و دووەم هیچکام لە شاخەوان عەبدوڵڵا، کاندیدی پارتی و ڕێبوار کەریم کاندیدی ڕەوتی هەڵوێست نەیانتوانی دەنگی پێویست بەدەستبهێنن.

 
ئەمڕۆ سێشەممە بۆ گەڕی سێیەم، پارتی شاخەوان عەبدوڵڵای کشاندەوە و فەرهاد ئەترووشی بۆ پۆستی جێگری دووەمی سەرۆکی پەرلەمانی عێراق کاندید کرد، دواجار پۆستەکە لە بەرژەوەندی ناوبراو یەکلایی کرایەوە.