2025 ساڵێکی سەخت بوو بۆ عێراق و بەم کۆمەڵە ئاڵنگارییەوە دەچێتە 2026

ئاڤا نیوز

 

ساڵی 2025 بۆ عێراق ساڵێکی پڕ لە جووڵەی سیاسی و دیپلۆماسی بوو، کە تێیدا لە ڕێگەی ئاشکراکردنی ئەنجامی سەرژمێریی گشتییەوە نەخشەی دیمۆگرافی نوێکرایەوە و پەیوەندییەکانی هەولێر و بەغداش پێشوەچوونیان بەخۆیەوە بینی، بەڵام دۆسیەی ئەمنی هێشتا وەک ئاڵنگاری مایەوە چەندین دۆسیەی گرنگ و چارەنوسسازی لەگەڵ خۆیدا بردووەتە 2026.

 

ڕووداوە گرنگەکان: گرنگترین ڕووداوی ناوخۆیی، بەڕێوەچوونی هەڵبژاردنی پەرلەمانی عێراق بوو لە 11ی تشرینی دووەم و پەسەندکردنی ئەنجامەکان، لەم ساڵەدا ئەرکی نێردەی نەتەوە یەکگرتووەکان (یونامی) پاش 22 ساڵ لە عێراقدا کارەکانی کۆتایی هات. پەرلەمان توانی چەند یاسایەکی گرنگ تێپەڕێنێت وەک "لێبووردنی گشتی" و "گەڕاندنەوەی موڵک"و" باری کەسی" هەروەها دەنگدان بۆ بەپارێزگابوونی هەڵەبجە و گۆڕانکاری لە سەرۆکایەتیی دادگای فیدراڵی، وێستگەیەکی دیکەی گرنگی ساڵەکە بوون.

 

گۆشەیەکی دیکە: پەیوەندییەکانی هەولێر و بەغدا چوونە قۆناغێکی نوێوە؛ دوای سەردانی سوودانی بۆ هەولێر، یاسای بودجە هەموار کرایەوە و تێچووی نەوت جێگیر کرا، ئەمەش ڕێگەی خۆشکرد بۆ واژۆکردنی ڕێککەوتنی دەستپێکردنەوەی هەناردەی نەوتی هەرێمی کوردستان.

 

لەلایەکی دیکەوە: هەر لە 2025 سەرۆکوەزیرانی عێراق جووڵەیەکی دیپلۆماسیی فراوانی بەرەو تاران، لەندەن و ئەنقەرە ئەنجامدا، بەڵام لەبەرامبەردا میوانداریکردنی لوتکەی عەرەبی لە بەغدا بەهۆی بەشدارینەکردنی زۆرینەی سەرکردە عەرەبەکانەوە، تووشی جۆرێک لە ساردی و شکست بووەوە.

 

لێکەوتەکان: پەیوەست بە دۆسیەی ئەمنی، هێزە ئەمنییەکان سەرکەوتنیان تۆمار کرد بە کوشتنی جێگری خەلیفەی داعش و دەستگیرکردنی جەلادەکەی "نوگرەسەلمان"، هەروەها دۆسیەی ڕفاندنی "ئەلیزابێس تسۆرکۆڤ" بە ئازادکردنی کۆتایی هات، بەڵام هێرشە درۆنییەکان بۆ سەر کێڵگەی غازی کۆرمۆر و ئاگرکەوتنەوە گەورەکەی واست، خاڵە ڕەشەکانی دۆسیەی ئەمنی بوون.

 

لە کۆتا ڕۆژەکانی ساڵدا پەرلەمانی عێراق خولی شەشەمی دەستپێکرد و سەرۆک و جێگرەکانی هەڵبژارد.

 

ئەوەی پێشبینی دەکرێت: لە کۆتاییدا عێراق بە کۆمەڵێک دۆسیەی هەڵپەسێردراوەوە دەچێتە ساڵی 2026ـەوە، کە گرنگترینیان بریتین لە: پێکهێنانی حکومەتی نوێ، مەترسیی سزاکانی ئەمریکا، هاوسەنگیی نێوان تاران و واشنتن، قەیرانی ئابووری، چاکسازی لە کەرتەکان و دۆسیەی کۆنتڕۆڵکردنی چەکی دەست گرووپە چەکدارەکانی نزیک لە ئێران.