کۆمەڵەی بەرگریی لە ئازادی ڕۆژنامەوانی عێراق: ئازادیی ڕۆژنامەوانی لە مەترسیدایە

ئاڤا نیوز

 

کۆمەڵەی بەرگری لە ئازادی ڕۆژنامەوانی عێراق ئاماژە دەکات ساڵی 2025دا لە عێراقدا هەوڵەکان بۆ کەمکردنەوەی ئازادییە ڕۆژنامەوانییەکان بە شێوەیەکی مەترسیدار زیادی کردووە.

 

چیرۆکی سەرەکی: ئەمڕۆ چوارشەممە، کۆمەڵەی ئازادی ڕۆژنامەوانی لە عێراق ڕاپۆرتی ساڵانەی خۆی دەربارەی ڕەوشی کارکردنی ڕۆژنامەوانی لە عێراق بڵاوکردەوە و ئاماژە بەوە دەدات، حکومەتی عێراق هەوڵی چاودێریکردنی میدیا و ڕۆژنامەنووسانی چڕتر کردووەتەوە و هەموو دامەزراوەکانی دەوڵەتی وەک ئامرازێک بۆ فشارخستنە سەر ئازادی ڕۆژنامەوانی بەکاردەهێنێت.

 

ڕاگەیێنراوی فەرمی: ڕاپۆرتەکە 182 پێشێلکاری لە ساڵی 2025 تۆمارکردووە، لەنێویاندا 34 حاڵەتی دەستگیرکردن و دەستبەسەرکردن، 53 حاڵەتی ڕێگرییکردن لە ڕوماڵکردن، 22 حاڵەتی هێرشکردن، 28 حاڵەتی داوای یاسایی بەهۆی کاری ڕۆژنامەوانییەوە، 7 حاڵەتی هەڕەشە و تۆقاندن، 2 حاڵەتی کوشتن و هەوڵی تیرۆرکردن، 4 حاڵەتی وەستاندنی پەخش، 21 پێشێلکاری لەلایەن دەستەی ڕاگەیاندن و گەیاندن، و 11 حاڵەتی تر.

 

هۆشداریی: بە پێی ڕاپۆرتەکە بەغدا زۆرترین پێشێلکاری تێدا تۆمارکراوە بە 62 حاڵەت، دواتر سلێمانی بە 22 حاڵەت و بەسرە بە 19 حاڵەت.

 

ئەوەی پێویستە بیزانیت: کۆمەڵەی بەرگری لە ئازادی رۆژنامەوانی لە عێراق بەو شێوەیە خۆیان پێناسە دەکەن: ئێمە کۆمەڵێک ڕۆژنامەنووس و پیشەگەری ڕاگەیاندنی عێراقین کە باوەڕمان بە ئازادی ڕاگەیاندن و ئازادی قسەکردن و بیروڕا هەیە، دوورین لە ناوزڕاندن و بوختان، یان هاندانی ڕق و دوژمنایەتی و لە پێناو پاراستنی ئازادی ڕادەربڕین هەوڵ دەدەین.

 

لەلایەکی دیکەوە: ڕێکخراوی پەیامنێرانی بێسنوور، کە بارەگای سەرەکی ئەمریکایە، ئاشکرای دەکات لە ساڵی 2025 لە هەموو جیهاندا 67 ڕۆژنامەنووس کوژراون، هەروەها 503 ڕۆژنامەنووس لە 47 وڵاتی جیهاندا زیندانیکراون و 135 ڕۆژنامەنووسیش بۆ ماوەی 30 ساڵە بێسەروشوێنن، هەروەها 20 ڕۆژنامەنووسی دیکەش رفێندراون.

 

ئاماری دیکە: بەپێی ئامارەکانی پەیامنێرانی بێسنوور لە ساڵی 2023دا 49 ڕۆژنامەنووس کوژراون، لە ساڵی 2024دا ئامارەکە بۆ 66 ڕۆژنامەنووس و ساڵی 2025 یش 67 ڕۆژنامەنووس بەرزبووەتەوە، بەڵام رێکخراوی یونسکۆی سەر بە نەتەوەیەکگرتوەکان لە ماڵپەڕی رەسمی خۆی ئاشکرای کردووە، لە ساڵی 2025دا 91 ڕۆژنامەنووس کوژراون.

 

لەسەر ئاستی عێراق: ڕۆژی 13ی ئازاری 2025، لەناو شاری بەغداد لەیس محەممەد ڕەزا، پەیامنێری ئاژانسی دەنگوباسی عێراق، لەلایەن پاسەوانی بەرپرسێکەوە کوژرا و کەسوکارەکەی ئامادە نەبوون پرسەی بۆ دابنێن هەتا تاوانبارەکە سزای تاوانەکەی وەردەگرێت.