هێزەکانی هاوپەیمانیی نێودەوڵەتی لە ماوەی هەفتەیەکدا بنکەی ئاسمانی عەین ئەسەد چۆڵ دەکەن

ئاڤا نیوز

جێگری فەرماندەی ئۆپەراسیۆنە هاوبەشەکانی عێراق دەڵێت، عێراق ساڵی 2025 سەرکەوتنی ئەمنی گەورەی بەخۆیەوە بینیوە و هێزەکانی هاوپەیمانیی نێودەوڵەتیش لە ماوەی هەفتەیەکدا بنکەی ئاسمانی عەین ئەسەد چۆڵ دەکەن.

وێنە گەورەکە: لە 21ـی ئابی 2025، کشانەوەی فیزیکی هێزەکانی ئەمریکا لە بنکەی عەین ئەسەد دەستیپێکردووە، بە گواستنەوەی سەرباز و هەندێک کەرەستەی سەربازی بۆ کوێت، چاوەڕوان دەکرێت لەگەڵ کۆتایهاتنی ڕێکەوتنەکەی نێوان عێراق و ئەمریکا بنکەکە بە تەواوی لە هێزی ئەمریکی چۆڵ بکرێت.

لێدوانی فەرمی: لیوا قەیس محەممەداوی، جێگری فەرماندەی ئۆپەراسیۆنە هاوبەشەکان، لە کۆنگرەیەکی ڕۆژنامەوانیدا ڕایگەیاند: ساڵی نوێ گواستنەوەی بەرپرسیارێتی ئەمنی پارێزگاکان بۆ وەزارەتی ناوخۆ دەبێت و هەماهەنگیشمان لەگەڵ پێشمەرگە بەردەوامە بۆ پاراستنی ئاسایش لە ناوچە سنوورییە هاوبەشەکان".

ئاماژەی بەوەشکرد: "لە ئەمساڵدا 39 تیرۆریست لە هێرشەکانی فڕۆکەی بێفڕۆکەواندا کوژراون و ڕێژەی دزەکردن لە سنوورەکانی عێراق گەیشتووەتە لەسەدا سفر".

باکگراوند: چەند مانگێکە بەرپرسانی سەربازیی ئەمریکا و عێراق بە ئاشکرا باسی دانوستان لەسەر ڕێککەوتن دەکەن. ئەو ڕێککەوتنە بە فەرمی کۆتایی بە ئۆپەراسیۆنی چارەسەری هەمیشەیی دەهێنێت، کە هاوپەیمانیی نێودەوڵەتی بە سەرۆکایەتیی ئەمریکا بۆ شکستپێهێنانی داعش لە ساڵی 2014 ـدا دروستی کرد.